CEBU, Philippines - Gipadayag sa chairman sa “Duaw Lungsod” nga si Monsenyor Marnel Mejia nga ginadili ang mga campaign materials ug posters sa politiko ug ubang propaganda materials atol unya sa fluvial procession sa Nobiyembre 30, 2012. Matud niya nga kinahanglang respetohon sa mga politiko ug ubang mga advertisers ang kalihokan sa simbahan kay kini usa man ka mahinungdanon nga kalihokan sa simbahan.
Sa reports sa GMA News Balitang Bisdak kagahapon si Cebu Coast Guard Station Commander Captain Rolando Punzalan nagkanayon nga mokapin 200 ka mga barko ug motor banca ang gipaabot nilang mosalmot sa procession.
Ang buot makasalmot kinahanglang mokuha og special permit gikan sa Marina-7 ug moparehistro sa Coast Guard.
Apil sa ginadili sa fluvial procession mao ang pagpabuto sa mga firecrackers, ilimnong makahubog, mga mahait nga hinagiban.
Ang Coast Guard ug Philippine Navy maoy mobarog nga marshal sa fluvial parade.
Sa fluvial procession, ang imahe ni San Pedro Calungsod isakay sa galleon nga panganlan og San Diego. Kini ang samang galleon nga gisakyan ni Santo Niño sa matag fluvial procession sa Sinulog.
Ang maong fluvial procession magsugod sa Ouano Warf padulong sa South Reclamation Project (SRP) kun asa ipahigayon ang National Thanksgiving Mass.
Pasirad-an usab sa Coast Guard ang Mactan Channel sa mga barko gikan sa ala 1:00 sa hapon hangtod alas 4:30 sa hapon atol unya sa fluvial. Duna say foot processions gikan sa Talisay ug Cebu City nga mag-abot diha sa SRP sa maong adlaw. (BANAT NEWS)