‘DRUG USER’ gipusil patay
CEBU, Philippines - Naglunang sa kaugalingong dugo ang usa lalaki human kini gipusil pasado alas-2 sa miaging hapon diha sa sitio Tender Heart sa barangay Day-as dakbayan sa Sugbo.
Ang biktima nailhan nga si Renante Suquib,34, molupyo sa dalan Cabantan sa barangay Luz ning dakbayan kinsa nakaangkon og samad pinusilan sa iyang dughan ug ulo. Usa ka Kenneth Camota maoy gitumbok nga mipusil kaniya.
Sa pasiunang imbestigasyon sa kapolisan nasayran nga ang biktima nakit-an pa sa mga residente nga naglingkod sa usa ka motorsiklo apan pipila ka minutos ang milabay gikatahong miadto kini sa sudlonong bahin sa maong dapit.
Dihadiha nadungog ang nagsunod nga buto sa armas ug pagsusi sa mga residente nagbuy-od na ug naglunang sa kaugalingong dugo ang biktima.
Si PO3 Leroy Baguio sa Cebu City Police Office, Homicide Section, mibutyag nga base sa ilang nakuhang impormasyon ang biktima usa ka drug user ug nagduda silang ang pagpatay kaniya may kalambigitan sa illegal nga drugas ug posibleng naalaan kining police asset.
“Basin naalaan na siya nga asset or posible gyud nagpalit na og drugs didto. Tiggamitan man sad na og druga gud,” matud pa ni Baguio. Nasuta usab sa kapolisan nga ang suspek bag-ohay lang nakagawas sa Cebu City Jail tungod sa kasong murder. “Engage na siya sa gun-for-hire,” pasabot pa ni Baguio. (/EIM) (BANAT NEWS)
- Latest
