Shootout usa angol, duha nadakpan

CEBU, Philippines - Samaran ang asawa sa gihulagway nga level 1 drug pusher samtang nasikop ang laing tulo ka kauban niini human sa nahitabong buy bust operation nga miresulta sa shootout pasado alas-12 sa udto diha sa sitio Buljok barangay Pulang Bato sa dakbayan sa Sugbo.

Ang mga nasikop mao sila si Marian Dhel Miñoza Dy; Alfredo Ardiente Jr., molupyo sa Langub Sirao, Mitzi Asigner Miñoza ug Rene Padayogdog.

Sa pakighinabi sa mga tigbalita ni Inspector Armando Labora  sa Regional Anti-Illegal Drugs Special Operations Task Group 7(RAIDSOTG)ang team leader sa maong operasyon misaysay nga dugay na nilang  gi- surveillance ang maong grupo.

Niadtong miaging adlaw ilahang gipalitan og 2.5 gramos ang mga suspek nga nagkantidad kini og P5 mil apan dihang misenyas na ang poseur buyer aron paduolon ang mga kaubanan giingong kalit nga may mipusil sa mga polis gikan sa likod nga bahin sa sakyanan sa mga suspek nga niadtong tungora nag-awto.

Tungod niini mibawos ang mga polis og natapsingan si Dy sa abaga. “Nakabantay man ko pagpusil kay ug wala pa,  aw, piti ta ato,” pasabot pa ni Labora.

Ang mga suspek misuway pa sa pag-ikyas luwan sa Honda Civic nga adunay plakang XBV-954 apan gigukod sila sa mga operatiba ug sa pagdalidali sa mga suspek nabanggaan pa niini ang usa ka multicab maong sila naapsan.

Matod pa ni Labora nga usa ka “family business” ang drugas sa mga suspetsado ug  makapagawas sila og balor P2.5 milyones nga shabu matag semana.

Dugang pa ni Labora nga dugay nang anaa sa ilang drug watchlist ang mga suspetsado ug kanunay nga mahisgutan sa ilang mga komperensya.

Gibutyag usab ni Labora nga ang ilang operasyon adunay koordinasyon sa buhatan sa Philippine Drug Enforcement Agency (PDEA)-7.

Nakuha gikan sa mga suspek ang  usa ka kalibre .45 nga pistol nga adunay unom ka buhing bala ug usa ka kabhang, gawas niini nakuha usab ang usa ka medium pack nga gituohang shabu. Ang mga suspek sa report sa Aksyon Bisaya News 5 mihimakak sa alegasyon sa kapolisan ug mipasangil nga planted ang mga ebidensyang nakuha gikan kanila ug gipasanginlan nilang gikulata sila sa polis. (BANAT NEWS)