CEBU, Philippines - Temporaryong gihunong kagahapon sa hapon ang pagdemolis sa mga kabalayan sa luna sa City Agricultural Office nga gipanag-iya sa kagamhanan sa siyudad sa Sugbo diha sa Barangay Mabolo. Moabot ngadto sa pito sa 32 ka mga kabalayan ang gipangguba kagahapon sa buntag nga gihimo sa mga sakop sa Prevention Restoration Order Beautification Enhancement (Probe).
Nasayran nga gamiton na sa siyudad ang maong luna ug himoon kini pagbalik og nursery sa mga tanom. Ang mga nagpuyo sa maong dapit nakalitan kagahapon sa gihimo sa Probe sanglit nakapending pa man unta ang gihimo nila nga hangyo sa Division for the Welfare of the Urban Poor (DWUP) nga hatagan sila og ekstensyon sa pagpuyo.
Ang presidente sa Nursery Urban Poor Association Incorporated nga si Jefrey Zapanta nagkanayon andam sila mohawa sa ilang nahimutangan apan dili pa karong panahona sanglit nagtungha pa ang ilang mga anak . Samtang gipadayag usab sa hepe sa DWUP nga si Atty. Collin Rosell nga bisan pa man nga temporaryong gihunong ang pagguba sa mga balay apan wa kini magpasabot nga di na ipadayon ang clearing operation.
Ipadayon gihapon nila kini sa higayon nga mahan-ay na ang tanan sa gihimo nilang proseso alang sa hingpit na nga pagpamalhin sa mga apektadong pamilya ngadto sa relocation site nga nahimutang diha sa sitio Laguerta sa Barangay Lahug. Mainiton ang gihimo nga diyalogo kagahapon tali sa mga sakop sa Probe ug sa apektadong pamilya. (BANAT NEWS)