CEBU, Philippines - Patay nang nadangat ang usa ka 2nd Engineer sa usa ka tugboat human gikatahong giunay og dunggab sa iyang kaubang tripulante atol sa ilang panaglalis ug sinukmagay diha sa South Poblacion sa lungsod sa San Fernando niadtong Lunes sa alas 5:55 sa buntag. Ang biktima mao si Teodoro Gawain, 42, 2nd Engineer sa MT Junel ug molupyo sa Bulacan. Samtang ang suspek mao ang iyang kauban nga si Eduardo Amistas Abinza,48, oiler sa maong tugboat nga taga Tanzan, Navotas City.
Matud ni PO3 Marjurkin Misuari sa San Fernando Police Station dihang nahinabi sa Banat News ang kapitan sa tugboat nga si Danilo Solibaga, 41, mibutyag nga hubog ang biktima dihang nakigkomprontase sa suspek.
Tungatunga sa ilang panaglalis misampot kini sa sukmagay apan naulang ra dayon sa mga tripulante. Apan giingong wala mopatuo ang biktima ug gipunayan og hagit ang suspek hinungdan nga kini nadunggaban sa liog ug dughan.
Ang mga kaubanan sa duha daling midala sa biktima sa South General Hospital sa siyudad sa Naga apan gideklarar kini nga patay na. Ang suspek mitahan sa iyang kaugalingon sa mirespondeng mga polis ug nagtingkagol na karun sa karsel samtang nagpaabot sa tukmang sumbong nga ipasaka batok niya.
Matud ni kapitan Solibaga dihang nahinabi sa Banat News sa telepono ang sinugdanan sa away sa biktima ug suspek mao ang oras sa ilang duty. Ang tugboat nag-angkorahi sa pier area sa San Fernando tungod kay naghatud kini og barge nga may dalang mga materyales alang sa usa ka pabrika sa semento. (BANAT NEWS)