CEBU, Philippines - Patay ang usa ka 22-anyos nga ulitawo human kini gibanhigan gikan nga naghatud sa mga dalaga nga iyang amiga diha sa sitio Tubod sa barangay Valencia sa siyudad sa Carcar kagahapon sa alas 12:30 sa sayong kaadlawon.
Ang biktima mao si Jay Tampan, 22, molupyo sa barangay Buenavista siyudad sa Carcar samtang padayon pang giila sa kapolisan kun si kinsa ang mamumuno.
Matud ni PO1 Mark Rosaroso sa Carcar City Police Station dihang nahinabi sa Banat News gikan naghatud sa mga amiga si Tampan ug padulong na untang mosakay sa iyang motorsiklo dihang kalit nga gipusil. Paglili sa mga molupyo sa lugar diin madungog ang butobuto sa armas nagbuy-od na sa yuta ang biktima.
Ang mga polis nga miresponde mao pay mihatud sa biktima sa Carcar City District Hospital apan gideklarar nga patay na kini.
Ang kapulisan mibalik sa crime scene kagahapong adlawa aron sa pagpanghipos og dugang impormasyon nga magtumbok sa mga mamumuno ug sa motibo sa krimen. Usa sa gidudahang motibo mao nga gisuyaan kini tungod sa paghatud sa mga dalaga sa maong dapit. (BANAT NEWS)