Nadat-ugan og kahoy

CEBU, Philippines - Nabali ang bukobuko ug nahiwi ang nawong sa patay’ng lawas sa usa ka manghakotay og ginabas nga kahoy dihang kini nadat-ogan sa iyang gipas-ang tablon sa kahoy human kini madakin-as samtang nagpas-an niini sa bukirang bahin sa barangay Can-asujan siyudad sa Carcar kagahapon sa alas 11:35 sa buntag.

Ang biktima nga patay nang naabtan sa mga kauban ug kapulisan mao si Daniel Villarta, 50, lumad nga taga Langtad sa siyudad sa Naga ug kasamtangang nagpuyo sa barangay Can-asujan, Carcar.

Matud ni PO1 Mark Rosaroso, desk officer sa Carcar City Police Station dihang nahinabi sa Banat News nga ang biktima naghakot og mga dagkung ginabas nga troso paingon sa ubos nga bahin apan pag-agi niini sa batoon ug dulhugong dalan nadakin-as ang tiil niini.

Tungod sa kabug-at sa trosong iyang gipas-an nga dunay gidak-ong 5x6 ug walo ka tiil ang gitas-on nalamba kini ug nadat-ogan niini.

Ang iyang kauban nga si Cesario Larrobis,73- anyos nga nagpaabot sa ibabaw nga bahin nabalaka tungod kay kapin na sa tulo ka oras ang milabay apan wala gyud mahibalik si Villarta.

Tungod niini ilahang gisubay ang giagian sa ubos ug diha nila maabting nadat-ugan na diay kini sa tablon sa kahoy  ug wala na magginhawa pa.

“Imposible lage kaayu sir, nahiwi ang iyang baba unya ang bukobuko murag nabali makaingon ta nga imposible kaayung hitaboa,” dugang asoy ni Rosaroso.

Gihulagway usab nga mingaw kaayo ang lugar nga nahitaboan ug walay bisan usa nga nakakita sa hitabo hinungdan nga walay nakatabang sa biktima.

Ang kapulisan misalikway sa pagduda nga dunay foul play ang kamatayon niini sanglit makita man sa hitabo, wala pa usab matino kung legal ba ang pagpamutol og kahoy sa biktima ug sa kauban niini. (BANAT NEWS)