Dalagitang Aeta gipatay sa selosong uyab

CEBU, Philippines - Napalgang patay ug nabulit og mga samad dinunggaban ang kalawasan sa usa ka 18-anyos nga nitibong Aeta dihang kini napalgan niadtong Domingo sa buntag sa kalasangan sa Brgy. San Carlos, Anilao, sa Iloilo.

Ang biktima giila sa kapolisan nga mao si Julia Ann Valencia, residente sa Brgy. Vista Alegre, Anilao, kinsa nakaangkon og pito ka samad dinunggaban sa kalawasan nga gituohang maoy nakaingon sa hinanali niining kamatayon.

Si Senior Inspector Engelbert Banquillo, ang hepe sa Anilao police station base sa imbestigasyon mitumbok sa 25-anyos nga uyab sa biktima nga si Marky Jagorin nga maoy suspek sa maong krimen.

Base sa gihimong imbestigasyon, katabang sa usa ka panimalay sa lungsod sa Dingle ang biktima ug miuli sa ilang lungsod alang sa bakasyon niadtong Nobiyembre 2.

Matud pa sa amahan sa biktima nga nananghid kaniya ang anak nga bisitahon ang igsuong babaye sa Brgy. San Carlos ug aron motan-aw sa Banaag Festival sa Anilao. Apan imbes nga moadto sa maong festival gikatahong miadto ang biktima sa balay sa uyab.

Matud pang Banquillo ang suspek diha mag-abutan sa balay sa 79-anyos nga si Luis Senanin human kini palayasa sa mga ginikanan. “His attitude of being rowdy when he is drunk had him getting the boot from their house,” dugang pa ni Banquillo.

Si Jagorin maoy gipabaton sa mga hayopan ni Senanin. Niadtong Nobiyembre 3, si Senanin mibutyag sa kapolisan nga nagdungan sila og paniudto ug mipahuway na siya human niini.

Nianang pagkakaadlawon nakadungog siya og siyagit nga dunay nangayo og tabang ug dihang iyang gisusi iyang nakita si Jagorin nga gigukod ang biktima ug gikabay-an dihang naapsan.

“He thought that the suspect and the victim were just on a brawl,” matud pang Banquillo, ug dihadiha nangayo og tabang si Senanin sa mga silingan apan walay miduol hinungdan nga sa iyang kahadlok misulod na lang siya og balik sa iyang lawak ug nanirado.

Nianang pagkahayag-hayag na nagpauban siya sa mga silingan ug gisusi ang dapit diin magbuno ang manag-uyab ug maoy ilang naabtan ang wala nay kinabuhing biktima. Ilang gipahibalo sa kapolisan ang hitabo.

Gidudahang selos maoy hinungdan sa krimen sanglit ang igsuon sa biktima mibutyag kang Banquillo nga gwapa ang biktima ug daghang mga nakarelasyon.

 “Maybe, she got a text message from her other boyfriend and Jagorin knew about it,” sumala pang Banquillo kinsa midugang nga nagpadayon pa  ang operasyon pagpangita sa suspek. (EIM)(BANAT NEWS)