Life span sa Filipino di mosaka sa pagka karon

CEBU, Philippines - Gawas  lang  kun  mosagop  pagbalik  ang  tawo   sa pagkaong  organic    lisud  na  mapun-an  ang  life span  o  kinutbanan  sa edad  sa  mga  Filipino  nga 68 anyos.

Kini  ang  gibutyag  ni Ronnie Jamola, hepe  sa Mandaue Station  sa Department of Agriculture (DA) 7   atol  sa AGIO Forum kinsa  nagkanayon  nga  ang  walay  bugto  nga  gikombinse  nila ang  mga mag-uuma  nga  mosagop  pagbalik  sa panguma  nga  organic.

Iyang  gipasabot  nga  kining  maong  matang  sa panguma   gidid-an  ang  mga    mag-uuma  sa paggamit  og  abuno  nga  kemikal  ug  insecticide  nga  kemikal.

Gibutyag  ni  Jamola nga ang abuno  nga  gikan sa  compost  o  mga lata  nga  sagbot ug  gikan sa  mga  hugaw  sa hayop  nga  gipaagi  sa vermiculture  maoy  bugtong  paagi  aron  makakaon  na  ang  tawo  og  organic  nga  pagkaon.

Sa maong paagi matud  pa  niya, mahimong    motaas-taas  og  dyutay  ang  life  span  sa  mga Filipino.

Sa  unang  mga  panahon  walay  migamit  sa  mga  abunong kemikal  ug insecticide  nga  kemikal hinungdan  nga  ang  pagkaon  sa unang  mga tawo  pulos organic  busa  tag-as  og  edad  ang tawo  kaniadto.

Didto  sa Uropa, ang life span  o  gitas-on  sa kinabuhi sa  katawhan didto molanat  og 82  anyos ug  layo  kaayo  ang gintang  sa  life  span  sa  mga  Filipino.

Kini  tungod  kay  bisan  mga langyaw  o taga  kasadpan  ang  nagpasiugda  sa  mga  fast food  nga  ania  sa Pilipinas kansang  mga  pagkaon  sinagolan  og  mga  kemikal, apan  sa ilang  mga  panimalay  migamit  sila  kasagaran  og  mga  pagkaon  nga organic.

Dinhi  sa Pilipinas  wala  pay  usa ka porsiyento  sa tanang  mga  mag-uuma  nga  nakakat-on  sa pagpanguma  nga  organic  tungod  kay  ang  ilang  giapas  mao  ang  dako  og produksyon  ug  dako  og kinitaan  ug kini  mahimo lamang  pinaagi  sa  panguma  nga conventional  o  paggamit  og  kemikal  nga  abuno.

Busa sa 95  milyones  nga  populasyon sa Pilipinas   wala’y  usa  sa  mga  Filipino  nga  wa  mogamit  og  pagkaong  may kemikal  matag  adlaw.

Tungod  kay  sa pagkaong may kemikal  naa  man  magsukad  ang  mabug-at  nga sakit  sa tawo,  hinungdan  nga  tagsa  ra kaayong  mga  Filipino  nga  molahutay  og  dugay  una  mamatay. (Liezl M. Frasno-Correspondent/WC)(BANAT NEWS)