Human sa aksidente bokal Caminero kinahanglang operahan

CEBU, Philippines - Wala’y dakung kadaut nga nahiaguman sa ulo si Bokal Aladin Wilyamie Caminero human sa pagkasugat niini og aksidente sa sakyanan niadtong Biyernes sa buntag.

Kini ang gipahibawo sa amahan niini nga si Bokal Wilfredo “Willy” Caminero.

Hinuon matud pa ni Willy nga anaa pa gihapon si Aladin sa intensive care unit sa tambalanan samtang gitakda  pa ang operasyon sa mga bali sa iyang bukog ugmang adlawa.

Matud pa ni Willy nga moestorya na panagsa si Aladin apan mobalik ra usab dayun kini sa pagkatulog.

Nagtuo si Willy nga madugay-dugay pa ang pagka-alim sa iyang anak gumikan sa grabeng mga bali sa bukog ug bun-og sa kalawasan.

Si Aladin kinsa maoy pangulo sa Sangguniang Kabataan Federation sa lalawigan sa Sugbo kauban sa tulo ka amigo ang nahiagum og disgrasya sa national highway sa Barangay Binlod, lungsod sa Argao. Base sa imbestigasyon nga si Aladin ug kaubanan luwan sa Ford Everest gikan sa Barangay Poblacion padulong sa Barangay Taloot sa dihang ilang nasaghiran ang 13-anyos nga si Christian Zamora nga naglakaw daplin sa karsada.

Gilikayan unta ni Aladin ang bata apan maoy iyang nabanggaan ang Hyundai Starex nga gimaneho sa 41- anyos nga si Celrick Paul Redoña nga taga Peace Valley , Lahug, dakbayan sa Sugbo kinsa padulong untang moparking sa iyang sakyanan sa garahe. Gawas sa kakusog sa pag-igo sa Ford Everest, nabangga pa gyud kini sa usa ka punoan sa kahoy nga maoy hinungdan sa grabeng mga samad ug bun-og ni Aladin ug kaubanan.

Ang laing mga nangaangol mao sila si Michael Vincent Mansueto, 22; Joel Mendoza, 22, nga taga Barangay Poblacion, Argao ug Clint Bryan Pelayo, 26, nga taga Barangay Lamacan. (Gregg M. Rubio/EIM) (BANAT NEWS)