Lahug-Guadalupe Access Road gipanindot

CEBU, Philippines - Gisugdan na sa dakbayan sa Sugbo ang pagpanindot sa karsada nga nahimutang duol  sa Singson Village, Guadalupe aron daghang motorista ang madasig na pag-agi sa bag-ong karsada nga molaktud paingon sa Lahug nga dili na moagi atubangan sa Kapitolyo.

Ang bag-ong karsada nga nagdugtong sa Guadalupe paingon sa Barangay Kalunasan hingpit nga nahuman sa miaging buwan apan wala pa kaayo’y nangagi niini tungod sa kabati sa karsada nga nahimutang duol sa Singson Village.

Kaniadtong miaging semana, nasuta sa Banat-Manobela nga gisugdan na sa Department of Engineering and Public Works (DEPW) ang pagboldos sa karsada nga libaongon aron inigkahuman, aspaltohon.

Kadtong mga motorista nga mopaingon sa Lahug gikan sa Guadalupe ug kanait nga dapit makaabut na sa Gorordo Avenue sa gidugayon lang nga diyes minutos.

Ang mga sakyanan nga moagi sa bag-ong “alternative road” gikan sa Guadalupe adto molusot sa Sudlon road lahos na sa Gorordo Avenue.

Hinuon, atol sa bag-ong gabii, nabantayan nga makasinati na og problema sa trapiko ang maong eskina sa Gorordo Avenue ug Sudlon kay ang maong dapit walay traffic lights ug mag-ilogay ra ang mga drayber sa paglusot.

Sa wala pa kining maong bag-ong karsada, ang mga sakyanan nga gikan sa Lahug ug gustong mopaingon sa Guadalupe, kinahanglan gayud nga moagi atubangan sa Kapitolyo.

Ang mga opisyal sa City Traffic Operations Management (CITOM) naglaum nga unta ang pagbukas na sa bag-ong karsada sa Guadalupe ug Kalunasan makapasulbad sa kahuot sa sakyanan nga moagi sa M. Velez ug Don Gil Garcia kilid sa Kapitolyo.

Traffic Education(Compulsory Signs)

U-Turn Prohibited sign

Kini nagpahimangno sa mga motorista nga dili mo-U Turn sa bisan asang bahin sa dalan nga ilang gisubay. Kini sagad makita sa mga dalan nga gibahin pinaagi sa linya, center islands ug uban pa. TIPS:  Ayaw gyud  pag-U-turn sa dalan nga duna niini sanglit kung madasmagan ka sa ubang sakyanan ikaw maoy sad-an. (BANAT NEWS)