P70 mil nga alahas gisakiyo sa kiriwan

CEBU, Philippines - Gidimalas  ang  usa ka maestro  dihang  pagbiya  niya  sa iyang  balay  kay  midagkot  sa lubong  sa iyang  mga  minahal  sa kinabuhi  sa  sementeryo sa sitio Sambag, barangay Tuyan, siyudad  sa Naga niadtong Huwebes  sa hapon, gikiriw  sa wala hiilhing kawatan  ang  iyang  mga  alahas  nga mibalor  og P70 mil.

Ang biktima nailhan nga si Carmenchu Padios, 31, usa ka magtutudlo sa pampublikong tunghaan sa maong  lugar

Sa inisyal nga imbestigasyon sa kapolisan nasayran nga ang biktima mibiya sa ilang balay aron managkot sa sementeryo.

Apan  sa iyang  pagbalik  nasuta  niya  nga guba na ang lock  sa ilang main door hinungdan nga  misulod dayon  siya ug  gisusi  ang  nahitabo  sa sulod sa iyang  balay.

Didto nalusno  siya  dihang iyang nasayran nga ang iyang mga   bulawan   nga alahas  sama sa  ariyos, singsing, kwentas ug cellphone, wala na sa gibutangan niini.

Hinungdan nga dali siya nagpakitabang sa kapolisan aron masubay kun  kinsay nangahas sa pagsulod sa ilang balay.  Si PO2 Elmer Naval sa Naga Police  Station, misaysay  nga ilang nasuta nga ang kawatan silingan  ra  sa biktima.

Matud  pa  niya  nga malagmit  ang  biktima  ra  maoy  gibantayan  sa maong  kawatan  nga  mobiya  sa ilang balay  ug  didto  miataki  dayon  kini  sa pagkiriw  sa  mga  alahas  sa biktima.

Ang  mga  tigpaniid  nagkanayon nga  bisan  ang  mga santos   wala  makabadlong  sa maong kawatan  nga unta adlaw  man kadto  sa  mga  santos. (BANAT NEWS)