Ig-agaw patay sa ig-agaw

CEBU, Philippines - Maayong pagkabuslot sa agtang sa usa ka lalaki human giunay pagpusil sa iyang ig-agaw nga gwardiya pasado alas-9 sa buntag kagahapon diha sa sitio Sun-ok barangay Ibabao lungsod sa Cordova.

Ang biktima nailhan nga si Antonio Cañete Baguio, 53, molupyo sa maong lugar samtang ang suspetsado nailhan usab nga si Gregorio “Gori” Baguio, 35, gwardiya sa usa ka tindahan sa syudad sa Mandaue.

Sa pakighinabi sa Banat News ni SPO1 Laurencio Wagwag, sa Cordova Police Station miingon nga ang biktima uban sa duha ka higala nag-estorya sa usa ka lantay pipila ka metros gikan sa giabangang balay sa suspek.

Matud pa kalit miduol ang suspek ug mipusil sa biktima sa walay igong hinungdan ug milakaw palayo ug gibiyaan ang biktima nga nahagba sa yuta.

Nasuta sa imbestigasyon nga dugay nang nagdumot ang suspek ngadto sa biktima tungod sa karaan nilang panagbangi, niadtong tuig 2008 nagsumbagay ang duha.

(BANAT NEWS)