Partido di garantiya sa kandidato aron makadaog

CEBU, Philippines - Dili garantiya ang partido alang sa usa ka kandidato aron kini makadaog sa piniliay, mao kini ang pasidaan sa beteranong kongresista nga si Kong. Eduardo “Eddiegul” Gullas sa unang distrito sa lalawigan sa Sugbo.

Sumala pa niya bisan unsa pang partido, oposisyon man o administrasyon dili kini maghatag og kasigurohan sa usa ka kandidato aron makadaog.

Si Gullas kinsa last termer na sa kongreso ug magpapiling mayor sa dakbayan sa Talisay sa sunod tuig mikomento sa reaksiyon sa grupo sa oposisyon sa siyudad nga nanigurong makuha nila ang mayoriya sa konseho.

Matud sa kongresista nga matag partido gustong mohupot sa mayoriya apan walay bisan kinsa ang makasiguro. Si Gullas kinsa napiling mayor sa Talisay niadtong tuig 2004 ang atbangan ni Johnny V. Delos Reyes (JVR) kinsa modagan isip mayor sa siyudad sa umaabot eleksiyon.

Si Delos Reyes nangangkong dili siya maoy makaatbang gyud ni Gullas kondili ang mga Talisaynon.

Ang runningmate ni JVR mao si incumbent councilor Romeo Villarante kinsa modagan isip bise mayor sa sunod umaabot eleksiyon ug tinguha sa ilang partido nga makuha ang mayoriya sa konseho sa Talisay.

“Ang makatubag niana ang mga tawo ra gyud sa Talisay. Ato nang mahibaw-an inig human sa eleksiyon,” ni Gullas pa kinsa miingon nga maninguha usab ang ilang lineup sa eleksiyon. (BANAT NEWS)