CEBU, Philippines - Pipila sa mga polis nga nagbantay sa sementeryo sa barangay Poblacion dakbayan sa Talisay atol sa Adlaw sa mga Santos niadtong Huwebes gipasanginlang maoy milala sa mga beer nga ilang nasakmit gikan sa mga vendor ug sa mga nag-inom sulod sa maong sam-ang.
Kini base sa gibutyag sa usa sa mga vendor nga naninda duol sa nahisgutang sementeryo kinsa mipasangil nga nangalasbag ang maong mga polis nga wala niya hinganli gumikan sa kadaghang beer nga gipangyarok niini.
Apan si Supt. Eddie Recamara, hepe sa kapolisan sa maong dakbayan lig-on nga nanghimakak sa maong pasangil tungod kay matud niya siya ang nangulo sa team nga mikompiska sa mga ilimnong makahubog nga gipamaligya sa palibot sa sementeryo niadtong Huwes sa gabii.
Matud pa niya nga daghan kaayong mga beer nga ilang nasakmit gikan sa nanag-inom sa sulod sa menteryohan ug sa duha ka vendor nga maoy namaligya niini.
Matud pa niya nga ang tanang nasakmit nga mga ilimnon ila dayon nga gitunol ngadto sa public assistance center sa kapolisan duol sa pultahan sa sementeryo.
Si Recamara nagkanayon nga gipanghatagan niya og inventory receipt nga gipirmahan niya ang mga tag-iya sa mga ilimnong makahubog aron inig gawas nila sa sementeryo ipakita lang nila ang maong inventory receipt sa police nga in-charge sa assistance center aron makuha nila og balik ang ilang mga binotelyang ilimnon.
Apan kadtong mga botelya nga adunay sulod apan wala nay tabon gipayabo niya kini duol sa assistance center.
Ang hepe nagkanayon kini nga posibleng nasuko kanila ang mga tawong ilang giimbargohan og ilimnong makahubog ug nagtuo gyud nga giinom nila ang mga beer tungod kay ang ubang mga botelya sa beer wala nay sulod human kini ipayabo niya sa yuta. (BANAT NEWS)