Duha ka menor tipi sa bangga sa motorsiklo
CEBU, Philippines - Patay ang duha ka mga menor de edad nga nagmotorsiklo dihang ilang gikasungag ang laing motorsiklo una pa mosampak sa nag-parking nga Isuzu pickup gahapon sa kaadlawon sa national highway sa Sitio Looc, Barangay Nailon, Bogo City.
Patay nang nadangat sa Bogo Provincial Hospital sila si Ernesto Alburo, 15, ug Ralph Vincent Gilig, 16, pulos taga-Barangay Nailon.
Sakay sa kontra niini nga motorsiklo mao sila si Erwin Duhaylungsod, 21, taga-Barangay Gairan, Joel Balunan, 30, taga-Barangay Nailon, ug usa ka naila lang sa pangalan nga Ariel, taga-Palompon, Leyte ug nalanding usab sa Don Vicente Sotto Memorial Medical Center human sa maong hitabo.
Matud ni Chief Insp. Ceferino Tabay, hepe sa Bogo City Police Station, mibutyag nga sila si Alburo ug Gilig paingon sa Barangay Nailon gikan sa Barangay Gairan.
Samtang sila si Duhaylungsod ilang gikasugat diha sa kurbadahong dalan nga miresulta sa maayong pagbinanggaay sa duha.
Matud pa human magkabangga ang duha ka motor nalahos ang duha ka menor de edad sa pickup nga nakapasamot sa ilang pagkaangol.
Nasuta usab sa imbestigasyon nga ang mga nagmaneho sa maong mga motor pulos walay mga lisensya sa pag-drive. (BANAT NEWS)
- Latest
- Trending
