CEBU, Philippines - Naunay ug napusilan sa lalaki ang iyang higala human ang suspek naalimungawan sa pagkatagak niya sa gikatulgang bangko kagahapon sa kaadlawon diha sa barangay Liong sa lungsod sa Dumanjug.
Ang biktima nailhan nga si Richard Maquipotin, 35, molupyo sa barangay Calabon sa maong lungsod samtang ang suspek mao ang higala niining si Jembel Porponio, 32, molupyo sa barangay Looc.
Sa pakighinabi sa Banat News ni PO2 Rafael Baritua, misaysay kini nga ang biktima ug suspetsado gikan sa usa ka disko sa maong lugar.
Apan ang duruha nagkasinabot nga usa mouli mohapit una sila sa sam-ang aron makighugoyhugoy sa mga barkada apan giingong giduka silang duha ug ang suspek nakatulog sa ibabaw sa usa ka bangko.
Sumala pa nga samtang natulog kalit natagak sa bangko ang suspek maong giduol kini sa biktima aron alsahon apan gialimungawan kini ug kalit nga miibot sa giluklok nga armas ug gipusil ang biktima sa walang bahin sa lawas ug sa tiil.
Ang biktima daling gidala sa Barili District Hospital apan gideklarar kini nga dead on arrival.
Matud pa ni Baritua nga human sa maong insidente ang suspetsado misibat apan kagahapon sa buntag pasado alas-10 mitahan kini sa iyang kaugalingon uban sa iyang pamilya.
Ang duha giingong suod nga managhigala apan gisusi pa nila ang uban pang posibleng motibo sa hitabo. (BANAT NEWS)