Nobiyembre 2 Computer "worm"

CEBU, Philippines - 1988—Nakapaukay sa kalibutan ang usa ka computer ‘worm’ nga gipakatap sa usa ka gradwado sa Cornell University nga si Robert T. Morris. Ang maong ‘worm’ mitakodtakod sa ubang mga computer sa tibuok nasud sa Amerika. Ang pagkatap niini nakapaungot sa mga computer. Matud pa ni Morris ang maong program (worm) daw may utok nga mosanay ug mobalhinbalhin sa ubang mga computers ug wala siya magtuong ingon niadto kini kapaspas nga mokatap sa kalibotan. Lakip sa mga computer nga naigo sa maong ‘worm’ naglakip sa  mga unibersidad, military sites, ug medical research facilities. Tungod niini mipakatap si Morris og mensahe pinaagi sa internet nga nagtudlo sa mga programmers unsay angayang buhaton aron mapatay ang ‘worm’ ug kapugngan ang pagbalhin niini sa ubang computers, apan gumikan sa kadako na sa nahimong kadaot sa maong ‘worm’ miungot usab ang iyang mensahe. Si Morris gipasakaan og kaso ug gipamulta tungod niini. (BANAT NEWS)