Tulo ka oras natang-gong sa traffic

CEBU, Philippines - Tulo ka oras nga kahuot sa trapiko ang nasinati sa mga motorista diha sa dakbayan sa Naga kagahapon tungod sa road widening sa Department of Public Works and Highways-7.

Si PO2 Jilmer Noval sa Naga Police Station sa pakighinabi niini sa Banat News kagahapon mibutyag nga ang kahuot sa trapiko nagsugod mga alas 10:00 pa sa buntag kagahapon ug naluag kini mga 1:30 na sa hapon.

Matud niya nga gikan sa national highway sa barangay Tinaan ngadto sa sentro sa barangay Poblacion paingon sa eskina sa dalan ngadto sa dakbayan sa Toledo naghuot ang mga sakyanan tungod sa road widening sa DPWH.

Sa laing bahin, ang hepe sa kapolisan sa probinsiya nga si Senior Superintendent Patrocinio Comendador nagkanayon “generally peaceful” ang pagsaulog kagahapon sa Adlaw sa mga Santos.

Sukad kagahapon sa buntag hangtud nianang hapon walay mga natalang dagkong hitabo sa habagatan ug amihanang bahin sa probinsiya sa Sugbo.

Ang tanang mga hepe sa kapolisan sa probinsiya gimandoang mosumitir og report matag duha ka oras.

Kagahapon sa buntag dugang usa ka police team gikan sa Cebu Provincial Police Office (CPPO) ang gipakatap diha sa Cebu South Bus Terminal tungod sa bul-og sa mga pasahero.

Si Supt. Julian Entoma, deputy provincial director for operation, nagkanayon nga dunay walo ka mga opisyal nga nangulo sa walo ka teams nga gipakatap sa tibuok lalawigan. (Brenda D. Batuto ug Ria Mae Y. Booc sa The Freeman/EIM)(BANAT NEWS)