Ginamit nga tiket gibaligya

CEBU, Philippines - Gipahimangnoan sa Port Police ang mga sumasakay batok niining mga mapahimuslanong mga tawo nga namaligya og peke o ba kaha ginamit na nga tiket nunot niining pagdagsa sa mga pasaherong manakay og barko ug kanihit na sa mga baratohong tiket.

Kini human usa ka ‘ticket scalper ’ang nasikop sa Port Police tungod sa giingong pagpamaligya niini og ginamit nga tiket apan mas barato sa tinud-anay nga tiket sa barko niadtong milabay’ng gabii diha sa Pier 3.

Ang maong ‘ticket scalper’ nailhan nga si Jaymar Duarte, usa ka porter sa Madallon Transport kinsa gireklamo sa usa ka Randy Paller nga pasahero patubang sa Bato, Leyte.

Matud pa ni Insp. Mandy Majarocon, imbestigador sa Port Police nga nianang pagkagabii si Duarte gikatahong mibaligya ngadto ni Paller og ticket sa kantidad nga P400. Apan sa dihang misulod na unta sa waiting area si Paller iyang gikatingala dihang wala siya pasudla tungod kay ang iyang ticket dili na madawat kay ginamit na.

Tungod niini, si Paller mipalit nalang og laing ticket ug mitaho sa nahitabo kaniya ngadto sa port police kinsa dali usab nga misikop kang Duarte.

Butyag pa ni Majacoron nga positibong giila ni Paller si Duarte. Si Duarte miuli usab sa gibayad ni Paller. Gitun-an pa kung unsang kasoha ang ipasaka batok kang Duarte.

Samtang pahimangno ni Majacoron sa publiko nga magmatngon ug dili  magpailad ug adto lang gyud mopalit og tiket sa mga authorized ticketing agents. (BANAT NEWS)