DOST ug JPIC-IDCI motabang sa komunidad

CEBU, Philippines - Ang Department of Science and Technology (DOST)7 mipirma og Memorandum of Understanding (MOU) sa Justice, Peace and Integrity of Creations-Integrated Development Center Inc.(JPIC-IDCI) alang  sa  pag-ugmad  og  mga  sistema  nga ikaayo  sa  mga  komunidad.

Ubos sa maong kasabotan  ang DOST ug  JPIC-IDCI nagkauyon nga magtinabangay  sa paghatag og gahum sa komunidad nga makakat-on  sa  mga panukdanan  sa  Siyensya ug Teknolohiya.

Ang DOST-7 gitahasan ubos sa maong kasabotan sa paghatag og teknikal nga suporta sa mga proyekto sa  JPIC-IDCI  isip usa ka non-government organization (NGO). Kini nagtumong sa pag-usab sa katilingban ug komunidad ngadto  sa pagkahimong lig-on nga  kaabag sa kagamhanan  sa  pagpauswag  sa  ekonomiya.

Apan  dili lang kutob  sa maong  aspeto  kundi  ang  labing  gikinahanglan  sa komunidad  nga  molahutay  na  sa kinaugalingong pagpabarug  sa dagan  sa   politika, pagpuyo, panginabuhi  sa pagpamatuod  nga  kaantigo  nga mobarug  ug molahutay  sa iyang  kauswagan.

Tuyo usab sa maong organisasyon ang pag-implementar og mga programa nga naglantaw sa paghatag og tukmang gahom sa komunidad, proteksyon sa mga kababayen-an ug kabataan pinaagi sa paghatag og igong kaalam ug kapasidad niini, paghatag og maayong kalidad sa edukasyon alang sa mga kabus  ug usab suporta  alang sa  ginagmay  nga pamatigayon  sa mga kooperatiba. Ang duha ka partido nagkauyon usab sa pag-umol og mga komon nga proyekto ug usab pagpangita og tinubdan nga mosuporta sa maong mga proyekto.

Gisaysay usab sa maong kasabutan nga ang DOST mobulig sa JPIC-IDCI sa pagpalambo og lokal nga teknolohiya ug usab himoong sayon  alang kanila  ang tanang pasilidad ug serbisyo niini aron sa pagsuporta sa mga aktibidad sa maong organisasyon.

(BANAT NEWS)