P1.7B nga budget sa Mandaue gibasa

CEBU, Philippines - Giaprobahan sa unang pagbasa sa regular session sa konseho sa dakbayan sa Mandaue ang giduso ni Mayor Jonas Cortes nga 2013 budget  nga nagkantidad  P1.7 bilyones.

Si Konsehal Beethoven Andaya nga maoy chairman sa committee on budget and appropriation sa konseho miingon nga ang   gisugyot nga gahin ni Mayor Cortes subli  nilang tukion  sa ikaduha  nga pagbasa sa ikaduhang semana karong  bulana,  Nobiyembre . Matud pa ni  Andaya nga   ang   maong  budget  nga  giduso  sa mayor   may  gamay  nga pagsaka  itandi  sa budget  niining tuiga  nga mikabat  lang  og  P1.6 bilyones .

Nining  giduso  karon  nga  budget  sa mayor nagpakita  nga  ang general  fund  account  maoy may  labing  dako  og  pahat  nga mokabat  sa P1.47 bilyones

Samtang   ang  development   gigahinan  og P89.6 milyones, P91. 8  milyones ang gigahin alang sa merkado publiko, P19 milyones alang sa ihawan, P48.3 milyoness  alang sa Mandaue City Hospital ug P7.5  milyones ang gahin alang sa Mandaue City Sports and Cultural Complex.

Gipatin-aw ni Konsehal Andaya nga ang kinatibuk-an nga gahin sa executive department nga P730, 556, 392.02  maoy dili gayud mausab ug kun adunay mahimong   kuhaan way lain gawas sa gigahin ngadto sa nagkalainlaing  departamento   sa kagamhanan  sa dakbayan.

Dugang pa niya nga ang gahin sa engineering office dako usab  kaayo  tungod kay alang  kini sa mga road maintenance   nga naglakip  usab  sa  mga drainage project sa dakbayan . (WC) (BANAT NEWS)