Gibuko-buko pagluba angol
CEBU, Philippines - Nalandig sa tambalanan ang usa ka 23-anyos nga lalaki human kini unaya sa pagluba sa iyang kainom sa barangay Cansojong, dakbayan sa Talisay kagahapon sa kaadlawon.
Ang biktima nga si Marlon Codilla, residente sa maong dapit kinsa nakaangkon og samad dinunggaban sa iyang buko-buko daling gidala ngadto sa Talisay City District Hospital apan tungod sa iyang kahimtang gibalhin kini ngadto sa Vicente Sotto Memorial Medical Center.
Ang suspetsadong si Mark Cabanes, 27, silingan sa biktima misibat usab dayon human sa maong hitabo ug padayon pa kining gipangita sa mga polis.
Sa imbestigasyon nila ni SPO1 Edgar Causon ug SPO1 Benjamin Sebellita, nasuta nga sa wala pa mahitabo ang maong pagpanunggab si Codilla ug Cabanes nag-inom sa lugar nga nahitaboan.
Samtang nag-inom giingong si Cabanes nangayo og kwarta sa mga taxi nga moagi sa maong dapit, hinungdan nga gibadlong kini ni Codilla.
Apan matud pa, gumikan kay lasbag na, nasuko si Cabanes sa pagpunay og badlong kaniya sa biktima hinungdan nga mihiwasa kini dayong lanit sa iyang kutsilyo ug giluba ang biktima. Tungod kay nagtalikod, wala makabantay ang biktima ug sa buko-buko niya motaroy ang kutsilyo.
Dihang nalup-og sa yuta ang biktima mibiya dayon ang suspetsado gikan sa maong lugar. (BANAT NEWS)
- Latest
