Eddiegul ug Samsam mihinabang sa namatay’ng driver

CEBU, Philippines - Ang pamilya sa drayber sa traysikad kinsa nadat-ugan patay sa midahiling yuta sa sitio Tabok Sapa, barangay Jaclupan, dakbayan sa Talisay sa milabay’ng semana  nakadawat og pinansiyal nga hinabang gikan kang Kongresista Eduardo Gulla sa unang distrito sa lalawigan sa Sugbo.

Ang kongresista uban sa iyang apo nga si Gerald Anthony “Samsam” Gullas Jr. mao mismo  ang  mitunol  sa maong  hinabang  ngadto  sa pamilya ni Ruben Tabura

Kahinumdoman nga si Tabura kinsa nagpanuigon na og 66 namatay dihang natabunan kini sa midahiling yuta  samtang naligo  sa usa  ka  tubod  duol  sa ilang balay sa Tabok-Sapa niadtong Lunes sa milabay’ng semana.

Ang maong pagdahili sa yuta naggumikan  sa pagbundak sa uwan nga dala sa bagyong Ofel. Gawas sa pinansiyal nga hinabang gikan sa Kongresista ang pamilyang Tabura ang gilaumang makadawat usab og pinansiyal nga hinabang gikan sa kagamhanan sa siyudad ug ubang mga ahensiyang hingtungdan sama sa Office of the Civil Defense ug Department of Social Welfare.

Si Samsam sa iyang bahin, mibutyag nga gawas sa pinansiyal nga hinabang nga ilang gitunol sa pamilya sa biktima misaad usab sila ngadto sa mga residente sa sitio Tabok Sapa nga patukoran nila ang maong lugar og foot bridge.

Ang mga molupyo sa maong dapit dugay na nga  nangindahay nga may foot bridge unta sila aron di sila maglisod sa pagtabok  sa sapa  sa  ilang  lugar.

Ang  labing nag-atubang  og  peligro panahon sa tingbaha    mao  ang  ilang  mga   anak nga mo-eskuwela nga molabang  sa sapa. Ang maong lugar may kapin usa ka kilometro ang gilay- on gikan sa sentro sa barangay Jaclupan. (BANAT NEWS)