Lalis sa kagawad ug panday usa patay

CEBU, Philippines - Barangay kagawad nga nakiglalis sa gikainom nadunggaban patay ang usa  diha sa barangay Tubod sa lungsod sa Badian niadtong Lunes sa alas 3:10 sa hapon.

Ang biktima mao si Salvador Robino Rafol, 48, kagawad sa nahisgutang barangay samtang gitumbok ang panday nga si Nicolas Perez Jr., 48, nga iyaha rang higala ug silingan maoy midunggab sa opisyal.

Matud ni PO1 Mauro Gramatica sa Badian Police Station dihang nahinabi sa Banat News nag-inom ang duha sa usa ka tindahan sa maong lugar. Dihang nangaluro na sa giinom nagkasumpaki ang duha nga misantop sa paghansak sa suspek og kutsilyo diha sa tiyan sa kagawad ug pagkahuman gibiyaan kini.

Gidala sa Badian District Hospital si Rafol apan  paglabay sa dul-an usa ka oras  nga pagtabang sa mga doktor namatay kini. Ang asawa sa suspek nga si Cerela mao nay mitawag sa telepono sa kapulisan nga motahan ang iyang bana ug nagpaabot ra kini sa ilang balay. Ang suspek gikatakdang pasakaan og kasong pagpatay. (BANAT NEWS)