Dagon sa Huyohoy

1829—Sa katapusan pormal nga mitahan niining petsaha ang mga Bol-anong rebolusyonaryo nga gitukod sa bayaning Bol-anon nga si Francisco Dagohoy, nga usa ka cabeza de barangay sa Bohol. Siya mao ang giilang labing dugay nga rebolusyonaryong mitahan ngadto sa mga Espanyol gikan sa iyang pag-alsa niadtong 1744. Ang tinud-anay nga pangalan ni Dagohoy mao si Francisco Sendrijas kinsa gipanganak niadtong 1724 diha sa Brgy. Cambitoon, Inabanga, Bohol. Nag-alsa si Dagohoy tungod sa grabeng pagpangabuso sa mga Espanyol ngadto sa mga Filipino nga gihimong mga saop ug ang nakapasamot niini mao ang wala pagbendisyon sa kapariang Espanyol sa iyang igsuon nga napatay sa usa ka duwelo. Ang rebelyon ni Dagohoy milungtad og 85 ka tuig batok sa nagkalainlaing 20 ka mga gobernador heneral sa Espanya dinhi sa nasud. Matud pa tungod sa kaidlas ug kamaayo sa panggubatan gituohan siyang adunay “Dagon sa Huyohoy”  ug sukad niadto gibansagan siyang “Dagohoy.”  Walay nasayod kung unsay gikamatyan ni Dagohoy didto sa iyang kampo sa kabukiran apan bisan pa man sa kamatayon niini gipadayon sa iyang mga sakop ang rebolusyon hangtud 1829.

Vatican miangkong husto si Galileo

 1992—Human sa 359 ka tuig, miangkon ang Vatican nga may basehan ug tinuod ang pangangkon sa astronomer ug pilosopong si Galileo Galilei nga ang kalibutan nagtuyok sa adlaw. Kaniadto ang Simbahang Romano Katoliko mibasura sa siyentipikong eksplinasyon ni Galilei nga nagtuyok ang mga planeta sa solar system sa adlaw tungod kay wala kini malatid sa Balaang Kasulatan. Human sa 13 ka tuig nga imbestigasyon mihukom sila ni Galilei nga “not guilty.” Niadtong 1633, sa edad nga 69 ansyos pugsanong gi-house arrest si Galileo sa Simbahan ug gimandoang mokompisal ug magbasol sulod sa walo ka tuig tungod sa iyang pamahayag.