Dul-an 50 mil pasahero modagsa

CEBU, Philippines - Mokabat sa kapin 40,000 ka mga pasahero ang gipaabot nga modagsa karon diha sa North Bus Terminal (NBT) sa barangay Subangdaku sa dakbayan sa Mandaue ug South Bus Terminal (SBT) sa dakbayan sa Sugbo niining adlawa Oktubre 31 tungod kay mamauli sa ilang mga probinsya nunot sa Adlaw sa mga Santos ug Adlaw sa mga Kalag sa Nobyimbre 1 ug 2 niining tuiga.

Diha sa SBT nanukad ang mga bus pasaheroan padulong sa habagatang bahin sa lalawigan sa Sugbu ug ingon man niadtong motabok sa Negros Oriental, Dumaguete, Siquijor ug uban pa.

Samtang sa NBT anha manukad ang mga pasahero nga mobiyahe paingon sa amihanang kalungsoran sa isla Bantayan, Camotes ug mga silingang lalawigan nga naglakip na sa Masbate ug Samar.

Ang tagdumala sa SBT nga si Carmen Quijano midugang na og kapin 20 ka mga gwardiya nga moabag sa kapolisan ug K-9 Unit.

Gidistino usab ang kapolisan og mga K-9 dogs nga maoy mohimo og mga pakisusi sa gidala nga kargamento sa mga pasahero alang sa paghatag og kasiguroan sa ilang pagbiyahe.

Ang tagdumala usab sa NBT nga si Zosimo Jumao-as Jr. miingon nga midugang na sila og mga lingkuranan sa terminal aron dunay kalingkoran ang mga magpaabot nga pasahero.

Samtang dunay mga polis nga motabang sa seguridad. (EIM) (BANAT NEWS)