Organic farming ihungit sa mag-uuma — Jamola

CEBU, Philippines - Kinahanglan pang  hungitan  ang  mga mag-uuma sa kahibalo  ug pagsabot  bahin sa  organic  farming aron  sila  motukob niini.

Mao  kini  panglantaw  ni Dr. Ronnie Jamola, hepe sa Mandaue Station sa Department of Agriculture (DA-7)  nga  iyang  gipadayag  atol sa Association  of Government Information Officers (AGIO) Forum  didto  sa buhatan  sa Philippine Information Agency (PIA-7)  sa Sugbo  kagahapon  sa buntag.

Si Jamola  nagkanayon  nga  karong bag-o  pa  nga  gipatuman  sa  kagamhanan  ang  Republic Act 10068  nga  gitawag  nga  Organic Act  of  2010  dili  sayon alang  sa  mga mag-uuma  ang pagdawat  niini.

Gipakasama  ni Jamola  ang  mga  mag-uuma  karon  nga  hamtong  na kaayo  ug gahi na  ang kabukogan  busa  lisud  kaayo  ang  pagpaliso  niini  aron  mosagop  sa bag-ong  pamaagi  sa   panguma  nga itudlo  kanila.

Sa tulumanon  nga AGIO Forum  nga  gipalanog  usab  sa DYMR  Radyo  ng Bayan, gipakasama  ni Jamola  ang  mga  mag-uuma  karon  nga  hungitanan  sa  mga  tukmang mga kasayoran  bahin  sa organic  farming.

Kini  tungod   dugay  na  silang  nakombinse  bahin  sa gitawag  nga  conventional  farming  o paagi  sa  panguma  nga  gigamitan  og  chemical  o commercial fertilizer.

Apan  sumala  ni Jamola  nga  sukad  pa  sa sinugdan  gisagop  gayud  sa  mga mag-uuma  ang organic  farming kaniadto  sa unang  mga  panahon.

Apan  dihang  nag-anam  ka  moderno  ang kahibawo ug  ang  mga  kahimanan  ug  kasangkapan, miabot  ang  higayon  nga gipaila  sa  mga technologist  ang  bahin  sa  conventional  farming  o  panguma  nga  gamitan  sa modernong  matang  sa abuno.

Dihang  namatud-an  sa  mga mag-uuma  ang  ka-epektibo  niini  gumikan  sa pagsaka  sa ilang  production  sa uma  ug  ingon  man  sa ilang   kinitaan, nakombinse  sila  hangtud  nga naanad  sila  sa maong  sistema, sa walay  pagpakabana  nga misangko  na  sa   anam-anam   nga paghupas  sa  ilang  yuta  sa kaumahan.

Gawas  niini, sumala  ni  Jamola   nakita  sa tibuok kalibotan  ang  dautang epekto  sa paggamit  sa mga  kemikal  nga  makadaot  sa  klima  sa kalibotan nga misangpt  sa gitawag  nga    climate  change   ug global  warming .

Niining  bag-o  namatikdan  sa mga  batid  sa panguma  nga nag-anam  kaitos  ang  paningkamot  sa mga mag-uuma  dihang  ang  ilang kaumahan  dili  na  mohatag  og maayong  ani  kun  walay  abuno nga kemikal,  gipaila  og balik  sa kagamhanan  ang  bahin   sa organic  nga  panguma  o  matang  sa panguma  nga  mogamit  og  mga abuno  nga  gikan sa  mga  rekurso    sa palibot  ug  dili kemikal nga  gikan  sa  mga   lagyong  dapit.

Matud  pa  ni Jamola  nga ang  kasayoran  ug kamatuoran bahin  sa organic farming  kinahanglang  ihungit  pag-ayo  ngadto  sa mga  mag-uuma  kay  kun  sila’y pasagdan  dili  pa  sila molingi  niini, kay  ang ilang atensyon tua  sa conventional  farming.

Maoy  hinungdan  matud pa  ni Jamola  nga  gitun-an   pag-ayo  karon  sa  departamento sa panguma  ang  paagi  nga  mapasabot  pag-ayo  ang  mga  mag-uuma  bahin  sa organic  farming  aron  nga makabaton sila  og  kaikag  sa pagsagop  niini  pagbalik   aron maulian  ang  yuta    sa kaumahan  ug  masulbad  ang climate  change  ug global warming.( WC)  (BANAT NEWS)