Tiguwang padulong manabat natagak sa kanal patay

CEBU, Philippines - Patay nang nakit-an sa mga batan-on nga nangita og kaka ang 67-anyos nga dalagang gulang nga gituohang natagak sa kanal ug napantok ang ulo diha sa barangay Pungtod sa lungsod sa Oslob niadtong Biyernes sa alas 9:00 sa gabii.

Ang namatay mao si Marcelina Maghanoy Rolion, 67, caretaker sa pinuy-anan sa usa ka pari nga nahimutang sa maong lugar. Matud ni SPO1 Job Sarveda sa Oslob Police Station dihang nahinabi sa Banat News ang upat ka mga bata nag-iwag og sulo nga nangita og kaka niadtong higayuna.

Apan pagsum-ok nila sa kabugangan ilang nakita sa ubos nga bahin ang maong ginang nga nagbuy-od ug patay na hinungdan nga ilaha dayun kining gipahibalo ngadto sa kapulisan. Atol sa pakisusi sa kapulisan nasuta nga dunay samad sa agtang ang maong ginang nga gituohang maoy hinungdan sa kamatayon niini ug gituohang natagak kini sa maong kanal ug napantok ang ulo maong namatay.

Dugang nahipos nga impormasyon sa kapulisan ang maong ginang paingon untang mosabat og rosaryo sa pikas nga lugar apan pag-abot sa maong lugar tungod sa kangitngit sa dapit gituohang wala kini makabantay nga misimang na siya sa kanal ug natagak.

Ang kapulisan nirekomendar nga ipaubos sa autopsy ang patay’ng lawas pagtino kun wala bay foul play sa kamatayon niini apan ang mga kabanay kombinsido nga aksidente ang maong hitabo. (EIM) (BANAT)