CEBU, Philippines - Ang hepe sa Cebu City Hall Department of Public Services (DPS) miawhag sa mga opisyal sa Barangay Lorega-San Miguel nga motabang pagpadali nga mapagawas na ang gikinahanglang papeles aron matugyan na kanila ang bag-ong trak sa basura nga gipalit sa dakbayan alang sa ilang barangay.
Si Engr. Dionesio Gualiza miingon nga dili pa gyud nila mahimong itugyan sa Lorega-San Miguel ang trak sa basura nga alang sa ilang barangay kay kuwang pa ang gikinahanglan nga mga dokumento.
Miawhag si Gualiza nga si Kapitan Fritz Herrera ug kaubanan niya nga mga opisyal angay’ng moduol sa City Hall General Service Office (GSO) aron masayran nila kun unsa ang gikinahanglang dokumento aron ma-release na ang garbage truck. Sayo pa si Kapitan Herrera mireklamo kay hangtud karon padayong gitipigan sa DPS ang trak sa basura nga gipalit para sa Lorega-San Miguel samtang ang ubang garbage truck gihatag na sa ubang barangay.
Nasubo si Herrera dihang nakita niya nga ang garbage truck nga alang unta sa iyang barangay gigamit kini sa paghakot og mga basura sa ubang barangay dinhi sa dakbayan sa Sugbo.
Ang mga opisyal sa barangay Lorega-San Miguel nagduda nga basin og gituyo sa mga opisyal sa City Hall nga gilangan-langan ang pagtugyan sa mao nga garbage truck kay si kapitan Herrera usa man ka dumadapig sa Bando Osmeña Pundok-Kauswagan (BOPK).
Apan matud ni Gualiza nga andam nilang itugyan dayon sa Lorega-San Miguel ang garbage truck kun mahitsas na ang gikinahanglang dokumento.
Matud ni Gualiza nga ang pagpagamit sa garbage truck nga alang sa Lorega-San Miguel nahitabo lang kay dunay kakuwang og trak sa basura kay naguba ang ubang garbage trucks sa ubang barangay. (EIM) (BANAT)