Gipamusil 1 patay

CEBU, Philippines - Patay ang anak nga lalaki ug kritikal usab ang amahan niini nga gipamusil sa tulo ka mga minor de edad nga mga silingan diha sa Sta. Cruz Village sa barangay Basak, dakbayan sa Lapulapu alas- 7 pasado ang takna sa miaging gabii.

Ang namatay mao si Michael Oronea, 20, samtang talandugon ang amahan niini nga si Allan Oronea, 57, pulos nagpuyo sa maong dapit.

Si PO2 Luisito Ernie sa Homicide Section sa kapolisan sa maong dakbayan nga nahinabi sa Banat News miingon nga diha sa sulod sa ilang panimalay ang amahan ug anak nga mga biktima dihang kalit lang nga gisaka sa tulo ka mga batan-on ug mipusil kanila.

Ang tulo nga namusil sa amahan ug anak nga giingong pulos minor de edad daling nanganaug sa maong panimalay ug misibat pahilayo sa maong dapit.

Dali nga gidala sa Lapulapu City Hospital ang mga biktima apan ang anak nga si Michael nga nakabaton og samad pinusilan sa walang bukton lapos sa ilok nga milapos sa dughan gideklarar sa mga doktor nga dead on arrival.

Ang amahan nga si Allan nga nakabaton og samad sa tiyan u gibalhin sa Vicente Sotto Memorial Medical Center ug gipaubos kini sa operasyon sa pagkuha sa bala nga miungot sa tiyan niini.

Wala pa matino unsay motibo sa krimen apan gituohang posibleng atraso ra kini sa namatay ug ang amahan igo lang mitabang sa anak apan giapil sa pagpusil. (/EIM) (BANAT NEWS)