Pelaez supak sa vote buying nagtuo nga modaog bisan walay kwartahay

CEBU, Philippines - Nangangkon ang magpapatigayon nga si Efrain Pelaez nga modaug kini pagkamayor sa dakbayan sa Lapulapu sa 2013 Elections bisan gamay ra ang iyang campaign funds ug nga dili kini gamiton sa pagpamalit og botos.

Si Pelaez nga nahinabi sa mga tigbalita sa Tapok-Tapok sa NS Pension Hotel sa dakbayan sa Sugbo niadtong miaging adlaw mibutyag nga ang ilang partido walay kwarta alang sa pagpamalit og boto tungod kay tinguha man nila ang pag-usab sa kinaiya sa mga tawo.

Sumala pa niya ang kandidatong gamay ra og gastos sa kampanya mao kadtong dili mangawkaw kung silay mapili.

Si Pelaez miingon nga naglakip sa mga programa nga iyang hatagan og dakong pagtagad sa maong dakbayan mao ang higpit nga pagpatuman sa Republic Act 9003 kon Solid Waste Management Act of 2001.

Matud pa niya nga ang tukmang paghipos sa basura sa 30 ka barangay sa dakbayan nga gilangkoban sa 19 ka barangay sa mainland ug 11 ka barangay sa isla sa Olango maoy iyang hatagan og dakong pagtagad sanglit gitinguha man niya ang kalimpiyo niini.

Ang pagpatuman sa mga proyekto nga pang-imprastraktura sama pagpalapad sa kadalanan, pagpalambo sa mga kanal ug uban pa lakip kini sa hatagan usab niya og pagtagad sa iyang pangagamhanan.

Si Peleaz maoy gikasakbang ni Mayor Paz Radaza sa 2010 Elections apan naparot.  (BANAT NEWS)