Pag-ban sa plastic gisaway

CEBU, Philippines - Gisaway sa mga environmentalist ang mga opisyal sa kagamhanan nga mipatuman og balaod nga nagdili sa paggamit sa plastic sa pagtuo nga mao kini dugokan sa mga baha ug lunop sa mga dagkong siyudad sa nasud.

Si Engr. Amancio Dongkoy, solid waste management coordinator sa Department of Environment and Natural Resources (DENR) 7 mibutyag sa Banat News nga ang plastic kaabag sa panginabuhi ug pagpuyo sa tawo busa dili kini angay ihikaw ngadto sa katawhan.

Matud pa niya nga walay kasal-anan ang plastic ug ang nagpabrika niini kun kini mibara man sa tubig sa kasapaan, mga kanal, o kaha imbornal nga maoy dakong hinungdan sa pagbaha ug lunop sa mga kapatagang lugar sa nasud.

Gibasul ni Dongkoy ang mga tawo kinsa maoy tamhangan ug danghag ra kaayo uban sa tinuyo nga panamastamas pinaagi sa paglabay bisan asa sa mga plastic nga dili na nila gamiton.

Gisubay ni Dongkoy ang pamaagi sa ubang local nga opisyal sa kagamhanan nga mipatuman og mga ordinansa ug balaod nga ipagamit og balik ang mga bag nga papel.

Matud pa ni Dongkoy nga tinuod maayo man ang maong mga materyales kay dali mang malanay sa tubig busa gituohang dili makabara sa mga sapa ug mga kanal.

Apan tungod kay gikan kini sa mga   panit o dahon sa kahoy ug nag-anam na kaitus ang kakahoyan karon sa kalasangan gumikan sa panamastamas nga gihimo sa tawo, busa dili gihapon mosaler ug molahutay ang paggamit niining mga paper bag.

Mingon si Dongkoy nga ang plastic, mahimong i-recycle busa dili kini makadaot sa kalikopan.

Matud pa niya nga angayang disiplinahon mao ang mga tawo nga tiggamit sa plastic.

Angay ipatuman ang political will sa mga politiko pagpahamtang og bug-at nga silot niadtong mga tawo kinsa abusador sa paggamit sa plastic.

Gibutyag ni Dongkoy nga may duha ka mga mayor niining lalawigan sa Sugbo kinsa wala niya hinganli tungod kay iyang gikasab-an gumikan sa pagkaway alamag bahin sa pag-atiman sa basura unya nasuko pa nga iyang gitudloan.

Matud pa ni Dongkoy nga karong panahona bisan unsa ka banggiitan sa politiko apan way hanaw bahin sa maayong pagdumala sa basura, wala gihapoy kuwenta ang maong opisyal tungod kay nagpasabot kini nga hugawan siya ug nga pasagdan lang niya nga maghugaw-hugaw ang iyang konstituente nga gialagaran.

Busa matud pa ni Dongkoy nga matag politiko modumala sa usa ka komunidad kinahanglang ipakasama niya kini sa iyang kaugalingong balay nga hinlo og palibot ug labaw sa tanan desiplinado niya ang iyang mga sakop sa balay pag-atiman sa basura sa iyang palibot. (BANAT NEWS)