Lawas permanente nang Director sa Lapulapu

CEBU, Philippines - Si P/SSupt. Rey Lyndon Lawas, ang OIC Director sa Lapulapu City Police Office(LCPO) gitakda na nga mapermanenteng   na sa iyang katungdanan human sa pito ka bulan nga pagpanguna niini sa kapolisan sa maong siyudad.

Kini ang giluwatang pamahayag ni Lapulapu City Mayor Paz Radaza atol sa press conference kagahapon sa buntag. Si Radaza nagkanayon nga human niya makita ang katakos ug kaaktibo ni SSupt. Lawas sa iyang pagserbisyo sa kapolisan sa dakbayan sa Lapulapu siya mihatag na sa iyang rekomendasyon ngadto sa Camp Crame aron hingpit na kining manguna isip Director sa LCPO.

Matud pa ni Radaza   sa rating nga 1-10   si Lawas anaa na sa 8 porsiyento nga "rating"   nga mas taas kung itandi sa iyang gihatag nga rating sa milabay’ng pagdumala ni P/SSupt. Anthony Obenza.

Gumikan niini naglaom si Mayor Radaza nga padayonon pa ni Lawas ang iyang maayong serbisyo sa mga Oponganon ilabi na   nga mao kini lugar   nga gidagsaan sa mga turista ug mga dumoduong.

Samtang si SSupt. Lawas sa iyang bahin mapasalamaton kaayo sa administrasyon ni Radaza gumikan sa suporta nga gihatag niini ngadto sa pwersa sa kapolisan sa dakbayan sa Lapulapu.

Matud pa ni Lawas ingon niana ang   matang sa serbisyo nga iyang mahatag sa matag lugar nga iyang nadestinohan   ilabi na kun ang mga opisyal sa lokal nga kagamhanan mosuporta kanila.

 Mapasalamaton usab si Lawas ngadto sa ilang labaw sa PNP Regional Office nga gihatagan usab siya og dugang mga sakop alang sa ilang operasyon ilabi na sa mga sakop sa tourist police.

Sa pagkakaron nagpaabot nalang si SSupt. Lawas sa kompirmasyon sa iyang posisyon gikan sa kampo crame. (WC) (BANAT)