CEBU, Philippines - Nahimong sentimental kaayo ang nahitabo nga demolisyon kagahapon sa mga balay sa Barangay Luz ning dakbayan sa Sugbo nga gitakdang matapos ugma.
Kini tungod kay sa 32 nga gub-onon, siyam lang ka balay ang naguba sa demolition team kagahapon didto sa Sitio Mabuhay. Gitakda na isunod sa pagguba karong adlawa ang ubang balay sa Sitio Nangka ug Sitio Lubi.
Ang 60 anyos nga si Baby Barellano igo lang nagpatulo sa luha nga nakighinabi sa Banat News gumikan sa gihambin niining kaguol nga papahawaon sila sa maong lugar.
Matud pa ni Barellano nga dugay na nga mga katuigan ang ilang pagpuyo sa maong dapit busa sakit kaayo ang iyang gibati karon niining pagpapahawa kanila gikan sa maong lugar.
“Dili lalim, dinhi na gud ang among panginabuhi ug karaan na kaayo mi nga namuyo dinhi, unya basta lang mi pahawaon,” matud pa ni Barellano.
Ang mga apektadong pamilya kasamtangang gipapuyo sa mga tolda nga gipahigayon sa kagamhanan sa siyudad sa maong lugar nga gipanggub-an sa ilang mga balay.
Samtang nagpadayon ang demolisyon, nagpadayon usab ang mga kamadrehan sa ilang vigil kilid sa demolition site.
Gipahibalo usab ni Mayor Michael Rama kagahapon mga hatagan niya og tag P10,000 nga financial assistance ang matag pamilya nga naapektohan sa demolisyon.
Samtang upat ka area ang posibli nga pilian aron himoon nga relocation site sa mga apektadong pamilya nga naglangkob sa Barangay Tisa, Inayawan, Bulacao ug Basak Pardo.
Gimandoan na usab ni Rama ang Department of Social Welfare and Services (DSWS) nga hatagan og mga pagkaon ang mga apektado sa maong demolisyon.
Pipila ka mga residente ang nagyawyaw gumikan kay wala motambong ang mga opisyales sa barangay nga gipangulohan ni Kapitan RianTante.
“Sa oras nga amo siya (kapitan) gikinahanglan, wala gyud siya mopakita namo. Buot hunao-hunaon ,nibotar mi niya pag-eleksyon,” matud pa sa usa ka tawo nga apektado sa demolisyon apan nagdumili sa pagbutyag sa iyang pangalan.
Usa sa rason sa pagpapahawa sa maong mga molupyo sa maong lugar mao ang kapakyas nila sa pagbayad sa ilang obligasyon sa Community Mortgage Program.
Nitiyabaw ang mga apektado sa demolisyon sanglit kasagaran kanila nagpuyo na sa maong dapit sukad pa niadtong 1958. Ang presidente sa Barrio Luz Urban Poor Fraternal Organization (BLUFPO) nga si Generosa Corbeta misaysay nga gikasubo nila pag-ayo ang hitabo ug andam unta sila mohinabi sa mga mopuli sa ilang luna aron masabtan ang ilang kahimtang. “Bisan kami kabus, kami andam mobayad ug amo silang ulian sa ilang nagasto,” matud pa ni Corbeta. (Sanden J. Anadia/WC) (BANAT NEWS)