CEBU, Philippines - Patay ang usa ka lab-asero og isda human kini madasmagi sa naghaguros nga minibus sa paglabang niini sa karsada didto sa barangay South Poblacion sa siyudad sa Naga kagahapon sa alas 5:50 sa buntag.
Ang biktima nga didto na makabsi sa iyang kinabuhi sa tambalanan mao si Dionisio Bacalan,56, nagpuyo sa sitio Little Valley, barangay Colon sa siyudad sa Naga.
Ang nakadasmag niya mao ang Isuzu minibus nga nagbiyahian og Carcar- Cebu nga rota nga gimaneho ni Jason Lapaz, 35, nagpuyo sa barangay Mahayahay sa siyudad sa Carcar.
Matud ni PO2 Cristino Canono sa Naga City Police Station nga nahinabi sa Banat News paingon sa siyudad sa Sugbo ang maong pasaheroan dihang paglabang sa biktima nadasmagan kini.
Sumala pa ni Canono kusog kaayo ang dagan sa minibus maong sa pagkaigo sa biktima nalabay kini og pipila ka metros gikan sa gibarogan niini.
Namatay si Bacalan samtang gitabang sa South General Hospital sa siyudad sa Naga tungod sa grabeng kadaut sa lawas ug ulo niini.
Samtang ang drayber sa minibus boluntaryo hinuong mitahan sa iyang kaugalingon ngadto sa kapulisan.
Ang mga minibus nga pasaheroan dugay nang gireklamo sa mga pasahero tungod sa kapeligro sa dinad-an sa mga drayber niini hinungdan sa mga aksidente. (Darrel A. Carumba/EIM) (BANAT NEWS)