Duha ka barko naaberya apan mga pasahero luwas

CEBU, Philippines - Duha ka barko sa Trans-Asia Shipping Lines Inc. ang nangaaberya tungatunga sa kadagatan tungod sa problema sa mga makina niadtong Domingo sa gabii samtang padulong sa ilang mga destinasyon. Tungod sa hitabo gimando sa Maritime Industry Authority-7 ang pagsuspenso sa maong duha ka barko.

Ang tigpamaba sa MARINA-7 nga si Jose Cabatingan nagkanayon nga ang Passenger Ship Safety Certificate sa M/V Trans-Asia 3 ug M/V Trans-Asia 5 gisuspenso sugod kagahapon.

"While the accident is an isolated occurrence, we are diligently addressing it and have promptly initiated corrective actions on the vessel in order to avoid similar occurrence in the future and to resume serving the riding public," matud pa ni Abner Llenos, ang human resource manager sa Trans-Asia sa gipadala nilang pamahayag.

Si Cebu Coast Guard station commander Capt. Rolando Punzalan nagkanayon nga ang 4,790.00 gross tonnage nga M/V Trans-Asia 5 dunay 531 ka pasahero ug 16 ka tripulante ug auxilliaries.

Samtang ang 2,908.47 gross tonnage nga M/V Trans-Asia 3 dunay 188 ka pasahero, 16 ka tripulante ug 28 ka auxilliaries.

"The officers and crew as well as the management, have attended to the needs of our valued passengers," dugang pa sa pamahayag.

Si Punzalan mibutyag nga ang Trans-Asia 5 napagngan kini og makina pag-abot sa kadagatan sa siyudad sa Naga samtang naglawig padulong sa Cagayan de Oro City, gikatakda unta kining moabot didto alas-8 sa buntag kagahapon.

Tungod niini giguyod kini sa usa ka tugboat pabalik sa Sugbo.

Samtang ang Trans Asia 3 nga gikan sa Ozamis City nakasinati usab og susamang problema dihang napagngan sa makina pag-abot sa Shell Island sa bukana sa Mactan Channel pipila ka minutos na lang gikan sa pantalan sa Cebu City.

Matud pa sa report sa GMA News Balitang Bisdak kagahapon, nahutdan ang maong barko og krudo. (Lesley Caminade-Vestil, Wen Celen ug Mitchelle Palaubsanon/EIM) (BANAT NEWS)