GRP-MILF peace deal taas pag latason

CEBU, Philippines - Taas pa kaayo ang latasonon sa bag-ohay lang napanday nga inisyal nga kasabutan tali sa gobiyerno ug sa mga rebeldeng Moro Islamic Liberation Front (MILF) sumala pa sa mga eksperto.

Niadtong Lunes gipahibalo ni Presidente Benigno Aquino III nga nagkasabot na ang gobiyerno ug MILF sa ‘blueprint’ aron matapos na ang giyera sa Mindanao sa dili pa matapos ang iyang termino.

Sumala pa sa report sa Agence France Press, base sa plano nga hipuson na sa gibanabanang 12 mil ka mga MILF fighters ang ilang mga armas bugti sa tukorong bag-ong semi-autonomous Muslim region nga pagatawgong “Bangsamoro.”

Ang duha ka habig miangkon hinuong daghang mga sensitibong mga punto pa unya silang atubangon nga kinahanglang mauyonan sa duha ka habig ug dunay mikwestyon kung mahuman ba gyud kini sa 2016.

"There are real differences between the two parties that they need to thrash out," sumala pa ni Rommel Banlaoi, ang executive director sa Philippine Institute for Peace, Violence and Terrorism Research, sa AFP.

"Meeting the deadline of 2016 will be difficult... the hardest part of the negotiations have only begun."

Ang MILF ug ubang pundok sa mga Muslim miisip sa Mindanao nga ilang ancestral homeland sukad pa sa panahon sa mga sultan nga wala pay mga Espanyol niadtong 1500s.

Apan mas misamot ang kasungian tali sa mga Muslim ug gobiyerno sa Pilipinas nga gidominar sa mga Kristiyano niadtong 1970s dihang giorganisar ang Moro National Liberation Front nga tumong mao ang pagbuwag sa Mindanao sa pamunoan sa Manila.

Mokabat sa kapin ug kulang 150,000 ka tawo ang namatay sukad sa maong kagubot, ang MNLF una nang nakig-uli sa gobiyerno apan ang daan nang mibuwag nga grupong MILF nga sagad gikan sa mainland Mindanao ug mao nalay labing dakong grupo sa mga rebelde mipadayon sa ilang pakigbisog.

Ang final agreement gipaabot nga mapirmahan tali ni Presidente Benigno Aquino III ug sa kadagkoan sa MILF ug representante sa Malaysia nga maoy mipatunga sa peacetalks. (/EIM) (BANAT NEWS)