CEBU, Philippines - Si kanhi Bokal Raul Bacaltos misaad nga mosuporta siya kang Bise Gobernador Agnes Magpale tungod kay nakaila siya niini.
Si Magpale magpapili isip bise gobernador sa sunod tuig nga eleksiyon ubos sa United Nationalist Alliance (UNA) ug ang iyang ka tandem si Hilario Davide III sa Liberal Party kinsa magpapiling gobernador sa probinsiya. Apan si Bacaltos miingon nga wala pa kini napiliang kandidato sa pagka-gobernador.
Niadtong Biyernes sa hapon atol sa pagsang-at sa certificate of candidacy sa grupo sa LP sa dakbayan , si Bacaltos mianha usab sa city hall busa daghan ang nagtuo nga mokandidato kini ubos sa LP.
Apan matud sa kanhi bokal nga igo lang siyang naghagbong sa iyang suwat sa post office niadtong higayona.
Giingong ang mga Bacaltos nagbuwag-buwag na karon og partido tungod kay si Antonio “Jojo” Bacaltos Jr., manghud ni bokal Bacaltos mikandidato isip konsehal sa siyudad alang sa eleksiyon sa sunod tuig ubos sa tiket sa Nacionalista Party.
Gipasabot ni Bacaltos nga wala mabahin ang ilang pamilya bahin sa politika apan aduna lang silay mga kaugalingong baruganan.
Gibutyag niya nga niadtong Huwebes buot unta siyang moadto sa buhatan sa Comelec sa Talisay aron mosang-at sa iyang COC kay buot siyang mokandidato isip independente apan gihangyo siya sa iyang inahan nga dili lang padaganon og dayon.
Apan wala ibutyag ni Bacaltos kung unsa nga posisyon ang buot niya untang daganan.
Matud niya nga kung modagan siya isip independente, iya kining kaugalingong risgo ug posibleng maguol ang ilang inahan ug dili siya buot nga adunay dili maayong mahitabo sa ilang inahan nga nagpanuigon na karon og 86-anyos.
Niining wala niya pagdagan sa eleksiyon sa sunod tuig si Bacaltos nangayo og pasaylo sa iyang mga supporter kinsa naglaom sa iyang pagdagan. (/WC) (BANAT NEWS)