56 mag-ilog sa 20 ka posisyon sa Cebu City

CEBU, Philippines - Moabot ngadto sa 56 ka mga tawo ang mag-ilog sa 20 lang ka posisyon alang sa 2013 Elections sa siyudad sa Sugbo base sa miduso sa ilang certificates of candidacy human sa lima ka adlaw sa buhatan sa Commission on Election sa siyudad. Matud pa ni Comelec North District Election Officer Marchel Sarno, mas gamay lang karon ang nangambisyon og pwesto sa siyudad itandi sa 2010 Elections nga miabot sobra sa 100 ka tawo ang mi-file og COCs.

Ang mga ilogang posisyon gilangkoban sa mayor, bise mayor , kongresista sa north ug south district , ug 16 ka mga konsehal alang sa duha ka mga distrito sa dakbayan.

Upat ang magtigi sa pagka-mayor sa piniliay sunod tuig nga gilangkoban nila ni Mayor Michael Rama sa Team Rama, Kongresista Tomas Osmeña sa Bando Osmeña Pundok Kauswagan (BOPK), ang mga indenpendente nga sila si Lea Ong ug Miguel Selim.

Moabot ngadto sa 17 ang nanagan pagka-konsehal sa north district samtang 22 usab sa south. Walo usab ang mga kandidato pagka-kongresista sa north nga gilangkoban nila ni Annabelle Rama sa Team Rama, kanhi kongresista Raul del Mar sa BOPK, ug ang mga independente nga kandidato nga sila si kanhi Judge Donato Navarro, Juan Arenasa, Pablo Doronio, Vicente Tan, Eliseo Tumulak, Marlo Maamo ug Florencio Villarin.

Samtang tulo ang mikandidato pagka-kongresista sa south district nga gilangkoban nila ni Atty. Aristotle Batuhan sa Team Rama ug ang independent candidate nga si Erlinda Sollano ug Konsehal Rodrigo Abellanosa sa BOPK.

Matawag usab nga one-on-one ang panagtigi karon sa posisyon nga pagka-bise mayor tali nila ni Bise Mayor Joy Augustus Young sa BOPK ug Konsehal Edgardo Labella sa Team Rama. (/EIM) (BANAT NEWS)