LP sa Talisay miduso sa ilang COC

CEBU, Philippines - Pormal na nga miduso sa ilang certificate of candidacy (COC) kagahapon sa hapon sa buhatan sa Comelec sa dakbayan sa Talisay ang mga kandidato sa oposisyon o Liberal Party.

Si Johnny delos Reyes “JVR” maoy mayor sa grupo ug si incumbent councilor Romeo Villarante maoy iyang tandem ug silang duha maoy nanguna sa ilang kompletong line-up   sa paghandos sa ilang COC.

Ang ilang mga kandidato sa pagkakonsehal mao sila si Aldin Diaz, Clifford delos Reyes, Val Ylanan, Tomas Embuscado ug Perenia Cabañero Tantog nga igsoon ni kanhi city councilor Shirley Belleza.

Samtang gihimakak ni Villarante ang huhungihong nga nagkabuwag-buwag ang grupo sa oposisyon sa Talisay base sa nasud-ong sa mga tawo nga wala magdungan ang grupo sa pagsang-at sa ilang COC kay may mohandos niini sa buntag ug ang uban sa pagkahapon.

Sa laing bahin, gihimakak usab ni Villarante ang report nga giingong ang iyang bayaw nga si kanhi bise mayor Lani Abarquez nga tua sa Australia mouli nganhi sa nasud ug posibleng mo -substitute isip mayor sa grupo. Gipasabot ni Villarante nga ang substitution alang lang sa mga pareha og apilyedo ug ang iyang bayaw nga si Lani giingong dili na mobalik nganhi sa nasud.

Matud ni Villarante nga nakadayeg sila ni JVR sa hukom niini pagdagan isip mayor sa Talisay sa sunod tuig nga eleksiyon atbang sa banggiitang politiko nga si Kongresista Eduardo Gullas sa unang distrito kinsa modagan usab isip mayor sa siyudad.

Si Gullas uban sa iyang bise mayor nga si Allan Bucao maoy nanguna sa ilang grupo sa pagsang-at sa ilang COC sa miaging adlaw. Si Villarante nagkanayon nga dili pasagdan sa ilang grupo si JVR.  (BANAT NEWS)