CEBU, Philippines - Gipahibalo kagahapon sa kapitan sa Barangay T. Padilla ug presidente sa Association of Barangay Councils (ABC) nga si Michael Ralota nga gipatun-an na niya karon sa iyang legal counsel ang paghimo og legal nga aksyon batok sa usa ka ginang nga namasangil kaniyang nanghagad og kwarta aron lang kini padaganon pagkakonsehal.
Ang gipasabot ni Ralota mao ang iyang konstituwente nga si Marietta delos Santos kinsa mipasangil kaniyang mitanyag og P200,000 aron modagan pagka-konsehal sa north district.
Sumala pa ni Ralota dako kaayo kining kadaot sa iyang imahe ingon man usab sa iyang partido. Usa ka kandidato pagka-konsehal si Ralota ubos sa BOPK.
Kahinumduman nga mialma ang kandidato pagka-konsehal sa Team Rama sa north district nga si Lahug councilor Mary Ann delos Santos gumikan kay posibleng sabotahe kini aron maapektohan ang iyang karera sa politika ug naglaraw usab og legal nga aksyon batok niini. (BANAT NEWS)