Social media di maoy sentro sa Anti Cybercrime Law

CEBU, Philippines - Gipasalig sa pangulo sa bag-ohay lang gitukod nga Office of Cybercrime ilawom sa Department of Justice nga dili nila tutukan ang mga internet users ilabi na ang social media sa ilang mga operasyon.

Kini dihang sagad sa mga tiggamit og social media ang mipadayag og pagsupak sa maong bag-ong balaod tungod sa mga probisyon niining bisan ang pag-like lang sa usa ka blog o ang pag-retweet sa mga maisip nga pagpangatake mahimo nang makasuhan og libelo nga mas bug-at pa og silot itandi sa kasong libelo nga nalatid sa Revised Penal Code.

Ang maong probisyon ug uban pang probisyon nga giisip sa kadaghanan nga paglapas na sa katungod sa mga Filipino maoy nakapabalaka sa mga internet users.

Sa usa ka report, si Justice Assistant Secretary Geronimo Sy kinsa maoy nangulo sa maong bag-ong gitukod nga buhatan sa DOJ nga ang target nilang tutukan mao kadtong mga transnational syndicates ug dili ang social media users nga basin nakalapas sa Cybercrime Law.

“Officially, hahabulin mo pa ba ‘yung mga ganyan? We don’t have enough time to go after the likers or those who tweet. Eh kung isang libo ‘yan? Or isang milyon ‘yung tweets. We will go after the really bad criminals. ‘Yun ang priority,” matud pa ni Sy sa anchor nga si Howie Severino sa GMA News TV “News To Go.”

Matud pa niya nga ang ilahang tutukan mao kadtong nagpasiugda sa mga makadaot nga mga pamahayag o kadtong unang mi-post niini ug dili kadtong mga mi-like o mi-repost niini.

Si Presidente Benigno Aquino III subling misuporta sa mga probisyon sa RA 10175 bahin sa kasong libelo apan andam siyang mopirma kung amendahan kini. (BANAT NEWS)