Duha ka akusadong kauban ni CGMA sa plunder mitahan

CEBU, Philippines - Duha sa nalakip sa mga gipasakaan og kasong kauban ni kanhi presidente ug karon kongresista Gloria Macapagal Arroyo sa kasong plunder ang mitahan sa ilang kaugalingon ngadto sa kapolisan.

Kini human gipagawas sa korte ang warrants of arrest batok ni Arroyo ug sa mga kaubanan niini sa kasong plunder niadtong milabay’ng Huwebes, si Arroyo gidakop samtang kini naa sa Veterans Memorial Medical Center tungod sa sakit niini.

Ang duha nga kanhi mga opisyal sa Philippine Charity Sweepstakes Office nga mitahan mao sila si kanhi PCSO General Manager Sergio Valencia kanhi PCSO Assistant General Manager for Finance Benigno Aguas sumala pa sa GMA News Online nga mikutlo sa report sa dzBB radio. Ang maong kasong plunder may labot kini sa giingong dili hustong paggamit sa PCSO intelligence funds nga nagkantidad og kapin P300 milyones sa panahon ni Arroyo dihang mao pa kini ang presidente sa nasud.

Matud pa sa report ang duha gidala na ngadto sa PNP Custodial Center sa wala pa ang tungang gabii niadtong Huwebes, giingong boluntaryong mitahan ang duha ug gipaabot nga motahan usab ang laing kanhi opisyal sa PCSO nga si Raymundo Roquero.

Samtang ang laing giakusahan nga si kanhi PCSO board member Jose Taruc V gikareport nga mibiya na sa nasud niadtong Hulyo 19, gipangita pa usab ang kanhi opisyal sa PCSO nga si Manuel Morato. (BANAT NEWS)