Street children papahawaon na sa sidewalk

CEBU, Philippines - Milihok na ang kagamhanan sa paghinlo sa mga sidewalk ning dakbayan sa Sugbo sa mga street children pinaagi sa gipalapdan nga programa niini nga mao ang Modified Conditional Cash Transfer Program (MCCT) sa Department of Social Welfare and Development (DSWD)7.

Sumala ni Brigida Tampus Goron, Provincial Link Pantawid Pamilyang Pilipino Program (4Ps) atol sa Kapihan sa PIA nga gipalanog sa DYMR Radyo ng Bayan Cebu nga ang tuyo niini   mao nga maprotehian ang kabataan nga tarongon sa pag-atiman sa mga ginikanan ug dakong kahigayonan nga mabalik pa sa ilang orihinal nga pinuy-anan ug dili na mahimong libud-suroy sa kadalanan ning dakbayan.

Matud pa ni Goron nga buot nilang ihatod ang ilang serbisyo dili lamang pinaagi sa 4Ps, kundi lakip na sa maong   mga kabataan nga libud-suroy ug kadtong   nabiktima sa pang-abuso pinaagi sa gipalapdang MCCT nga programa.

Apan gipasabot ni Goron nga adto nila kini ipaagi sa mga interesadong Non-Government Organization (NGO's) nga adunay dakong kaalam   sa pag-atiman sa mga steet children ug mga batang biktima sa pang-abuso.

Gitug-an ni Goron nga niadtong miaging buwan pa lamang sila nagsugod sa pagpangimbitar og mga NGO ug may   nadawat nga tulo ka mga project proposal gikan sa mga NGOP nga Bidlisiw, Forge, ug Lihok Filipina.

Hinuon gipasabot ni Goron nga aduna pay mga posibleng motunol kanila og mga project proposal sa uban pa nga mga   NGO. Samtang si DSWD Information Officer Aileen P. Lariba   nagkanayon usab nga sa dili pa nila aprobahan ang mga project proposal nga ilang nadawat, ila unang sutaon kun pasado ba kini sa   criteria nga   ilang gipangayo gikan sa mga aplikante nga mga NGO. Pipila niini mao ang   pagsuta kun   lisensyado ba ang maong NGO Wala bay record nga kriminal   ug uban pang kasayoran nga magkonpirmar nga    ang maong grupo kasaligan sa kuwarta nga ipiyal kanila sa goberno aron maatiman nila ang mga street children.

Kinahanglang akreditado   sila sa DSWD ug usab kinahanglang   may   financial statement   sila aron masuta sa taga DSWD nga kaantigo kining mohupot sa budget ug   may igo   ba kining pundo nga ikasarang unya kung pananglit adunay mga kakulian.

Sa pagkakaron gipasabot sa mga opisyal sa DSWD nga wala pa gayud silay gipagawas nga budget alang niining maong programa apan masaligon sila nga kadtong mga makapasar nga project proposal gikan sa mga aplikante nga NGO mapagawas gayud   ang kagamhanan og igong pundo aron masugdan gilayon kining maong programa.

Ang pundo nga ipagawas unya sa DSWD ngadto sa mga kwalipikadong NGO's mag-agad kung pila ang gidaghanon sa mga benepisyaryo nga mahimo nilang alagaran. (/WC) (BANAT NEWS)