CEBU, Philippines - Nasugamak ang usa ka drayber sa taxi sa pagpanunggab, ug mga bun-og sa kulata dayon gigapos sa wala hiilhing armadong mga tawo nga mitulis kaniya didto sa barangay Garing, lungsod sa Consolacion niadtong Huwebes sa gabii.
Ang biktima mao si Marlon Gabotero, 44 , minyo, nga taga Banilad, siyudad sa Mandaue ug usa ka taxi driver.
Nasayran gikan sa kapolisan nga ang mitulis sa biktima mao ang tulo niya ka mga pasahero.
Si PO1 Francisco Baltazar sa Consolacion Police Station mibutyag sa Banat News nga ang biktima didto paraha sa tulo ka mga nagpakaaron ingnong pasahero sa N. Bacalso Avenue siyudad sa Sugbo ug nagpahatud ngadto sa lungsod sa Consolacion.
Apan pag-abot sa maong lugar ang tulo ka pasahero giingong mition og armas sa biktima dayong deklarar nga tulis. Unya gikuha ang kuwarta nga kinitaan niya sa pamasahero nga nagkantidad og P2,500.
Tungod kay misukol ang biktima, gidunggab ang walang bukton niini dayon gitabangan og kulata ug gigapos ang duha ka kamot dayon gisud sa compartment sa iyang taxi.
Apan ang biktima nakahigayon sa pag-eskapo ug nakapangayo pa og tabang sa kapitan sa barangay San Roque, sa lungsod sa Liloan kinsa maoy mitugyan sa biktima ngadto sa kapolisan sa Liloan. Samtang giindosar usab dayon kini sa kapolisan sa Liloan ngadto sa Consolacion Police Station kay didto man mahitabo ang krimen. (BANAT NEWS)