Ginang gitanyaga'g P200 mil aron padaganon og konsehal

CEBU, Philippines - Usa ka 42-anyos nga ginang ang nangangkong gitanyagan siya og P200,000 sa kampo sa kapitan sa T. Padilla ug Association of Barangay Councils (ABC) president Michael Ralota nga padaganon pagkakonsehal sa north district sa siyudad sa Sugbo.

Giingong ang tumong niini aron libugon ang mga botante sa ilang pagbotar tungod sa pagkaparehas sa apelyedo niini sa apelyedo ni Mary Ann delos Santos sa Team Rama nga usa sa mga lig-ong kandidato.

Ang maong ginang nga si Marietta delos Santos, nga usa ka lumulopyo sa T. Padilla mibutyag sa mga sakop sa tigbalita nga niadtong Oktubre 2 sa hapon, gikuha siya ni Ralota ug laing duha ka mga lalaki ug gidala sa usa ka restaurant sa usa ka hotel diha sa dalan Gorordo.

Nakugang na lang si delos Santos gumikan kay ang usa ka lalaki nga kauban ni Ralota mitanyag kaniyang tagaan siya og P200,000 basta modagan siya pagka-konsehal sa norte.

“Nakulbaan ko og maayo ug nahadlok maong nibalibad ko,” sumala pa ni delos Santos kinsa sakop sa usa ka urban poor organization sa maong dapit ug dunay lima ka anak samtang gwardiya ang iyang bana.

Matud pa niya nga wala siya nagpadala sa maong tanyag gumikan kay nahadlok siya sa posibleng mahitabo kaniya ug sa iyang pamilya.

Samtang ang kandidato pagkakonsehal sa Team Rama nga si Barangay Lahug Councilor Mary Ann delos Santos nagdudang gituyo kini sa mga kaatbang niya sa politika aron maapektohan ang iyang paglangsad sanglit susama man kini og apelyido.

“Nagpaila lang na nga desperado na kaayo na si Ralota,” matud pa ni Mary Ann kinsa nagpasalamat sa maong ginang sa pagtug-an niini sa matuod.

“Hangyo nako sa tanang mga delos Santos, ayaw mo pailad kong dunay mga tawo nga moduol ninyo kung padaganon mo nga walay igong rason,” matud pa ni Mary Ann.

Nahimong taktika sa ubang mga politiko ang susamang pamaagi maong gidasig ang mga botante sa pagsuwat sa tibuok pangalan sa kandidatong ilang botaran ug dili lang apelyedo sanglit tungod sa pagkaparehas mahimong imbalido ang boto.

Samtang si Ralota dihang gitawgan sa Banat News sa iyang telepono aron kuhaan sa iyang habig bahin sa pangangkon sa maong ginang apan walay motubag sa telepono niini.

Apan sa interbyu kaniya sa dyLA Radio mihimakak sa pasangil ni Marietta si Ralota. Matud pa niya nga gipatawag niya si Marietta sa barangay hall niadtong Oktubre 2 apan igo ra siya nangutana niini kun interesado ba kining mahimong leader sa grupo sa kababayen-an sa ilang barangay.

Nahibulong siya pag-ayo kun nganong lahi na ang estoryang migawas nga dakong bakak. (BANAT NEWS)