Samsam Gullas sa Alayon mi-file og COC

CEBU, Philippines - Pormal na nga miduso kagahapon sa buntag diha sa buhatan sa provincial Comelec sa iyang certificate of candidacy ang apo ni Kongresista Eduardo Gullas sa unang distrito sa probinsiya nga si Gerald Anthony “Samsam” Gullas.

Isip sa pagpakita sa ilang suporta sa batan-ong Gullas miuban kagahapon ni Samsam ang iyang pamilya, mga mayor, konsehal ug mga kapitan sa mga dakbayan ug lungsod sa unang distrito. Ang mga dakbayan sa unang distrito mao ang Talisay, Naga ug Carcar samtang ang mga lungsod mao ang Minglanilla, San Fernando ug Sibonga.

Si Samsam nga nahinabi sa mga tigbalita kagahapon miangkon nga sa pagkakaron ubos pa gyud siya sa anino sa iyang apohan hinungdan nga nagsuroy-suroy siya sa mga lugar sa unang distrito aron mailhan siya ug makatukod na unya og kaugalingon niyang pangalan.

“I’ve learned that you have to put people ahead of you every single time…you should put other people on the spotlight because at the end of the day they are the one who gonna help you”, ni Samsam pa.

Giangkon usab sa batan-ong Gullas nga nagkinahanglan siya og mga tambag gikan sa mga opisyal sa unang distrito tungod kay nag-una pa sila kaniya sa politika.

Positibong gidawat ni Samsam ang mga pagsaway batok kaniya nga giingong wala siya’y nahibaw-an tungod kay bata pa kaayo siya.

Matud niya nga “that’s true but asa man ta magsugod?, I think everyone have to start somewhere and I am starting right now…Ako compare to Papa Eddie mas kondisyon ko nga motuyok-tuyok matag barangay ug motuyok og tambong sa mga inauguration basta imbitahon lang,” tubag pa ni Samsam.

Kabahin sa political dynasty nga isyu nagkanayon si Samsam nga nag-agad lang sila sa katungod ug tingog sa katawhan ug kung dili siya pilion sa mga tawo dili siya magdumot.

“We always submit ourselves to the right of the people…the voice of the people are always supreme….I submit myself to the electoral process and if the people do not like me, do not vote for me and I will pack my bag and leave dili ko magdumot. Because I’ve been working in UV (University of the Visayas) for seven years and UV for me is a public service for the people,” dugang ni Samsam. (BANAT NEWS)