Overloading sa barko gibantayan sa Coast Guard

CEBU, Philippines - Nagkalainlaing   mga kompaniya sa barko ang nag-umol karon og mga panukdanan aron mabatokan ang overloading o pagpasubra og mga pasahero.

Apan matud pa ni Philippine Coast Guard (PCG) 7 Commander Commodore Wiliam Melad nga sa pagkakaron wala nay problema sa overloading   tungod kay ang mga shipping companies ug mga operators motuman na sa hustong sukod sa gidaghanon sa ilang pasahero matag larga nila   base sa gitugot kanila pinasubay sa kapasidad sa pasahero nga angay ikarga sa ilang mga barko.

Atol sa bag-ohay lang gihimong panagtigom nga nagtimaan usab sa selebrasyon sa 2012 National Maritime Week (NMW) gibutyag ni Melad nga ang mga tinugyanan sa Coast Guard adunay responsibilidad sa pag-inspeksyon sa sakyanan sa dagat bahin sa gidaghanon    sa mga pasahero niini aron matino kung pila gayud ka tawo ang mahimong ikarga sa ilang sakyanan.

Ang maong selebrasyon adunay tema nga " 100 Years After Titanic: Lessons From Disasters" diin gitug-an ni Melad nga ang overloading maoy pirming mahimong isyu sa miaging maritime disaster sa nasud.

Ang maong opisyal mipadayag usab nga sa pagkakaron milambo na ang kapasidad sa mga taga dagat kon seafarer tungod sa daghang gipasundayag nga mga pagbansay-bansay nga gihimong mandato aron mahimo silang globally competitive.

Si Melad mipahibawo sa maong kalamboan sa maritime industry ug sa uban pang mga ahensya kinsa miimplementar usab og tukmang lagda ug mga reglamento aron masiguro nga luwas ang tanang mga pasahero sa mga sakyanan sa kadagatan. (WC) (BANAT)