Bureau of Customs gihinginlan na

CEBU, Philippines - Girekomendar sa Cebu City Disaster Risk Reduction Management Council (CCDRRMC) ang dinaliang pagbalhin sa mga kawani sa Bureau of Customs (BOC)   gikan sa ilang kasamtangan nga edipisyo gumikan kay kuyaw na kini sa linog.

Kini ang gibutyag ni CCDRRMC Chief Alvin Santillan atol sa earthquake drill nga gipahigayon sa buhatan sa BOC sa milabay’ng adlaw.

Matud pa ni Santillan    nga delikado na kaayo sa kalamidad ilabi na sa linog ang   maong edipisyo   nga nahimutangan sa BOC sa Cebu International Port (CIP) gumikan kay daghan nang mga timailhan nga kini kahugnoon   busa namiligro kaayo ang kinabuhi sa mga kawani ug kliyente niini. Niadtong miaging Pebrero ning tuiga nakita ni Santillan ang record sa Office of the Building Official (OBO) nga nagpakita sa susamang resulta sa ilang gihimong inspection sa edipisyo sa BOC busa mimando kini sa ilang dinalian nga pagbiya sa maong lugar.

Samtang si Cebu Customs District Collector Ronnie Silvestre sa iyang bahin   mipasabot usab sa iyang kabalaka sa maong rekomendasyon ni Santillan gumikan kay hangtod karon wala pay tubag ang ilang ulohang buhatan. Matud pa niya nga bisan ang mga opisyal sa dakbayan sa Sugbo wala usab magtagad sa gihangyo sa BOC nga unta   bawion ang daang Customs building nga nahimutang sa pier area dapit sa Plaza Independencia nga gihimong Malacanang sa Sugbo sa milabay’ng administrasyon ni kanhi presidente Gloria Arroyo.

Miingon si Silvestre   nga wala pa usab sila makadawat og tubag gikan sa Cebu Port Authority sa ilang hangyo nga tiwason una nila ning tuiga ang pag-okupar sa maong edipisyo samtang nangita pa sila og kabalhinan.

Ang unang nahuna-hunaang lakang sa mga kadagkoan sa BOC Cebu mao ang pagbutang og   mga tolda   sa Plaza Independencia kun pugson gayud sila pagpapahawa gikan sa edipisyo nga ilang nahimutangan karon.

Sayo niini gitagalan sila kutob sa katapusan sa Oktobre nga papahawaon na sila sa CPA   matud pa ni Silvestre.

Gumikan niini ang CCDRRMC   gidapit sa taga Customs aron maoy maniid sa ilang gihimong earthquake drill agi og pagtuman sa kamandoan sa RA 10121 nga nagkinahanglan nga ang tanang ahensiya sa goberno mopahigayon gyud og bansay-bansay sa paglikay nga daghang maalaot panahon sa kalamidad ilabi na sa linog (WC)  (BANAT)